Kawm ua kws hno tshuaj rau neeg mob ua ntej yuav phais

Dr Gary Yaj tham thiab qhia txog nws cov kev kawm 14 xyoos los ua ib tug kws hno tshuaj rau tej neeg mob ua ntej yuav phais thiab tom qab phais tas uas yuav tau tu thiab saib xyuas tus neeg mob ntawd li cas.

Dr Gary Yaj ua hauj lwm ntawm tsev kho mob. Credit: Dr Gary Yang

Dr Gary Yang (Dr Yeej Koob Yaj) kuj yog ib tug hluas Hmoob Australia uas tau kawm tiav los ua thawj tug kws hno tshuaj rau neeg mob ua ntej yuav phais, thiab txog rau lub 8 hli ntuj xyoo 2024 no ces nws yuav yog ib tug general anaesthesia consultant lawm tom qab kawm thiab ua hauj lwm los tau 14 xyoos.

Nws tau kawm tiav ntawm tsev kawm qib siab James Cook University ntawm Townsville. Thiab nws hais tias siv sij hawm 6 xyoo kawm sab kev kho mob thiab siv 5 xyoos los kawm tsi ntsees rau cov kev kawm los ua ib tug kws hno tshuaj rau neeg mob ua ntej yuav phais mob.

Nws hais tias 'muaj ntau theem rau cov kev ua hauj lwm kho mob'. Nws siv sij hawm 6 xyoo mam kawm tiav rau sab kev kho mob. Thiab twg ua hauj lwm xyaum uas kws kho mob tshiab tau 3 xyoos thiab.

Dr Yaj hais tias 'thaum yus tseem pib kawm thiab xyaum uas kws kho mob tshiab ces lawv cia yus mus sim ua hauj lwm ntau yam. Piv txwv li txhua txhua 3 hlis twg ces lawv yeej kom yus ua ib yam hauj lwm twg li ua hauj lwm ntawm chaw phais, emergency department, thiab pauv mus ua ntau yam hauj lwm.'

Dr Gary Yang kawm hno tshuaj rau neeg mob ntawm tsev kho mob Credit: Dr Gary Yang

Nws hais tias 'lub zeem muag mas lawv xav kom yus sim ua ntau yam hauj lwm seb yus nyiam ua yam twg thiab yus tshaj lij (keej) qhov twg, thaum twg yus xyaum ua tej hauj lwm no tag thiab yog yus nyiam sab seem kho mob twg ces yus mam li mus kawm ua specialist rau sab ntawd. Thaum ntawd ces ke kawm ke ua hauj lwm ua ke.'

Dr Gary hais ntxiv tias 'lub caij tseem xyaum ua hauj lwm ntawd ces kuv kuj tau ua hauj lwm hauv chav Intensive Care Unit (ICU) uas kho tej neeg uas mob sab heev thiab.'

Dr Yeej Koob Yaj hais tias 'peb yog cov saib xyuas txhua yam pib txij li thaum npaj yuav muab tshuaj rau tus neeg mob ua ntej yuav phais mus txog rau cov kev tu saib xyuas tus neeg mob ntawd tom qab phais tas kom tau txais kev noj qab nyob zoo thiab kom tsis txhob muaj teeb meem dab tsi rau lawv.'

'Peb yog cov saib tag nrho txhua yam kom hais tias koj xeev los thiab koj mob dab tsi los peb pab kom koj recover zoo tshaj plaws. Ces peb yog cov saib xyuas tej no,' raws li Dr Gary Yang hais.

'Tam sim no ces kuv yuav tau rov qab los saib xyuas cov mus kawm thiab pib xyaum uas hauj lwm li thaum xub uas kuv tseem kawm thiab xyaum uas tej hauj lwm no thiab,' raws li Dr Yeej Koob Yaj hais ntxiv.

Dr Gary Yang, Anaesthetist (2nd right) pose a photo with colleagues in Hospital Credit: Dr Gary Yang

Yog tham txog cov kev nyab xeeb (safety) rau cov kev hno tshuaj ua ntej yuav phais no tias ho zoo li cas rau tej neeg mob hno tshuaj ua ntej yuav phais mob ces Dr Yeej Koob Yaj kuj tshab txhais tias:

'Peb yeej tsis muaj peev xwm yuav guarantee tau txhua yam hauv ntiaj teb no 100 percent, tab sis peb yeej muaj tus expert uas kawm tiav txoj hauj lwm ntawd los nyob ntawd saib xyuas, vim rau qhov ua ntej yuav xav tshuaj rau ib tug neeg mob ua ntej yuav phais ces peb yeej txheeb txog tus neeg ntawd tej roj ntsha thiab txhua yam mus txog tus pa, peb yeej yuav tau saib xyuas kom zoo. Yog li peb txoj hauj lwm ces peb yuav tau ua tib zoo xyuas kom pab cawm tau nej txoj sia.''

Yog li ntawd kuv thiaj xav kom nej tsis txhob nyuaj siab vim rau qhov cov kev hno tej tshuaj loog (Anaesthetic) no yeej safe. Piv xam tias qhov cib fim (chance) es koj nkag hauv tsheb koj tsav tsheb es koj ua tsheb sib nraus tseem siab tshaj qhov es koj mus phais (ua surgery) es muaj teeb meem rau ib tug neeg.

Dr Gary Yang (Dr Yeej Koob Yaj, Anaesthetist)

Yog tham txog cov kev txhawb nqa tej me nyuam kawm ntaub kawm ntawv lawm ces Dr Yeej Koob Yaj kuj tau hais tias:

'Yus yog niam yog txiv ces yus yuav tsum tau pab txhawb nqa yus tej me nyuam, teeb lub zeem muag rau lawv thiab. Rau qhov me nyuam mas yog koj tsis muab lub zeem muag rau lawv, tsis nrog lawv tham txog ces lawv yeej tsis paub taug txoj kev thiab. Tab sis yog yus qhia txoj kev zoo rau lawv ces tej zaum lawv xav tias lawv taug tau no ces yeej taug tau thiab,' raws li Dr Yeej Koob hais.

Dr Yeej Koob hais tias 'tos hos nyiam kawm los kho mob los vim doctor yeej pab neeg, neeg muaj mob dab tsi los yus pab tau ces yus kuj zoo siab'.

Thiab muaj ib qho mas yus yeej xav kawm cov ntawv kom challenge yus me ntsis rau yus thiab, hais tias seb yus yog me nyuam Hmoob los yus mus nrog luag xeem seb xeem tau li cas. Yus tsuas paub tias txawm yus yog Hmoob los tsis muaj ib qho tias yus yog Hmoob ces yus kawm tsis tau. Qhov no ces yeej yog ib qho piv txwv tias yus yog Hmoob los mus xeem nrog luag nrog Meskas nrog lwm haiv neeg los yus yeej kawm tau tib yam li luag thiab.

Dr Yeej Koob Yaj (Dr Gary Yang, Anaesthetist)

ICU paeds incubation Credit: Dr Gary Yang

Dr Gary Yaj kuj tawm tswv yim me ntsis txog cov kev kawm tias 'qhov yuav rau siab kawm no mas yus yuav tsum tau teeb yus lub zeem muag (vision) thiab yus lub hom phiaj (goal) hauv yus nruab siab kom paub tseeb kiag tias yus xav ua dab tsi tiag tiag. Qhov no mas yuav tsum tau los ntawm yus tus kheej xwb. Txawm yus niam yus txiv muab tau lub zeem muag rau yus tab sis yog yus tsis raug siab yus tus kheej ces yeej kawm tsis tau. Yog li ntawd yus yuav tsum tau phoom tiag tiag mas yus thiaj yuav kawm tau. Yog li ntawd yus yuav tau nkag siab tias yus xav ua ib tug neeg zoo li cas kiag. Yog yus xav ua ib tug qauv zoo thiab muaj nqe rau Hmoob ces txawm nyuaj npaum li cas los yus yeej yuav tsum tau phoom tau mus xwb.'

Nws hais ntxiv tias 'qhov nws xav txhawb nqa mas yog thaum yus tseem kawm high school mas yus yuav tsum tau nrhiav kom paub tias yus nyiam dab tsi mas yus thiaj kawm tau. Thaum yus paub tias yus nyiam kawm dab tsi lawm ces yuav tau nrhiav tias seb muaj txoj hauv kev twg thiaj pab yus mus kawm ua ib tug expert rau phab txuj ntawd. Yog thaum yus paub tias qhov ntawd yog txoj kev yus xav taug lawm ces yus mam thov kev pab ntawm lwm tus pab yus. Ib qho ntawm peb cov Hmoob raws li loj hlob los ces peb yeej txaj txaj muag thiab yeej tsis tshua nug lwm tus. Ib qho kuv pom tias peb nug thiab kev ua phooj ywg nrog luag kom sib pab nrog yus. Kuv yus tau txais kev pab cuam tsis yog ntawm yus tsev neeg xwb tab sis tau txais kev pab los ntawm yus tej phooj ywg thiab. Rau qhov ib tug paub ib yam ces txawm yus tsis paub ib yam dab tsi los thiaj pab kom yus phoom tau mus. Txoj kev no mas tsis yog yus tib leeg xwb tab sis yeej muaj ntau tus neeg yuav tau phoom tib yam li yus thiab, yog yus paub share li nod no ces txoj kev no yooj yim zog rau yus thiab.'

Lo lus txhawb siab kawg rau Hmoob tej hluas uas Dr Yeej Koob Yaj xav hais ces 'kav tsij kawm, rau rau siab kawm, cov kev kawm no ces yeej tsis yog kawm rau yus, xub thawj mas yeej kawm rau yus, kawm kom yus keej, yog yus keej txaus no ces kom los pab sawv daws thiab, los pab peb haiv Hmoob thiab. Tam sim no mas kuv nyuam qhuav mus txog xwb od, tseem yog lub zeem muag tom ntej, yog nej peem tau mus thiab ces nej los nrog peb thiab es peb los pab haiv neeg Hmoob no seb mus tau li cas tom ntej no thiab.'

LUS TIM TSUM:

Dr Yeej Koob Yaj (Dr Gary Yang) cov lus no tsuas yog ib cov kev paub raws li nws cov personal experience qhia rau ib tsoom Hmoob ua kev paub xwb, yog koj xav tau txais kev pab cuam rau cov kev hno tshuaj ua ntej yuav phais los yog cov kev kawm tiag ces xav kom koj sab laj nrog cov professional paub txog sab seem txuj ntawd thiaj pab tau raws li qhov koj xav tau.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.