Kab mob twv nyom tshuaj

Australia yog ib lub teb chaws ntawm tej teb chaws vam meej uas muaj neeg noj tshuaj tua kab mob (antibiotics) ntau tshaj plaws hauv ntiaj teb no, ces tej kws kho mob thiaj ceeb toom tias yog tsis nrog xyuas ces ntshe yav pem suab Australia yuav tsis muaj tshuaj los kho tau tej kab mob nyaum heev lawm, vim cov kev noj tshuaj tua kab mob ntau heev thiab pheej siv thaum tsis tsim nyog siv ua rau kab mob twv nyom tshuaj ntau tuaj ntxiv.

Antibiotic resistant Pseudomonas aeruginosa bacteria, 3d illustration. Credit: CHRISTOPH BURGSTEDT/SCIENCE PHOT/Getty Images/Science Photo Libra

Tej kws kho mob tau ceeb toom tias yog tsis nrog txwv cov kev siv tshuaj tua kab mob kom tsis txhob siv ntau ces ntshe yuav muaj teeb meem loj rau Australia cov health care system rau yav pem suab.

Raws li lub koom haum Australian Commission on Safety and Quality in Health Care (Safetyandquality) tsab ntawv cej luam tshiab uas tau coj los qhia ces muaj neg siv tshuaj tua kab mob (antibiotics) tsawg txog li 25 feem pua rau xyoo 2020 thaum tseem muaj kab mob COVID-19 kis thoob ntuj. Tab sis nws kuj pom tau tias rov qab muaj tej neeg noj tshuaj ntau tuaj ntxiv txog li 10 feem puas tsaib no (2022) lawm.

Thiab txawm tias tej tshuaj tua kab mob yeej muaj peev xwm tua tau kab mob bacteria feem ntau txog li 99.99 feem pua los yeej tseem muaj ib txhia kab mob tsawg tsawg twv nyom thiab tej tshuaj antiobiotics no tua tsis tau ces ua rau tej kab mob no ras los ua ib cov kab mob nyaum heev lawm.

Ntau caum xyoo dhau los thaum peb tsim tau tus tshuaj penicillin siv uas muaj peev xwm tua tau kab mob ces sawv daws kuj xam tias yog ib tug tshuaj zoo heev. Ces peb thiaj pheej xav tias tshuaj tua kab mob antibiotics yuav muaj peev xwm kho tau txhua yam mob. Ces thiaj ua rau tej neeg mob xav siv tshuaj tua kab mob lawm.

Senior Medical Advisor for the Australian Commission on Safety and Quality Health Care, Professor John Turnidge

Thiab txawm tias tej tshuaj tua kab mob yeej muaj peev xwm tua tau kab mob bacteria feem ntau txog li 99.99 feem pua los yeej tseem tua tsis tau tej kab mob bacteria tsawg tsawg qee yam thiab ces tej kab mob no thiaj ras los ua cov keb mob nyaum thiab twv nyom tej tshuaj tua kab mob no lawm.

Tej kab mob nyaum no yog ib cov kab mob phom sij heev. Thiab yeej tau ua rau tej neeg mob ntawm Australia thiab ntiaj teb no tas sim neej coob heev. Tam sim no peb tseem muaj hmoo uas tseem muaj qee yam tshuaj zoo heev uas muaj peev xwm tua tau kab mob. Tab sis yog thaum uas tsis muaj tej tshuaj tua tau kab mob lawm ces yuav tsis muaj peev xwm kho tau tej neeg mob ntxiv lawm. Thiab ntshe yuav ua rau peb rov qab poob rau lub caij ua ntej tsov rog ntiaj teb zeeg ob lawm.

President of the Australian Medical Association, Professor Steve Robson

Nws hais ntxiv tias 'tej kab mob twv nyom tshuaj no yuav ua rau tej neeg mob muaj mob sab heev thiab mob sai heev. Thiab muaj qee zaus ces tus neeg mob twb nruam sim lawm peb tseem tsis tau muaj peev xwm txheeb tau tias yog mob dab tsi. Thiab yeej muaj tej xwm txheej no tab tom tshwm sim rau ntawm tej tsev kho mob thoob peb lub teb chaws no lawm. Ces thiaj yog ib cov teeb meem loj heev.'

Kuj tseem muaj ib cov kev txhawj xeeb thiab tias xyoo 2021 ntawd muaj cov kev sau tej tshuaj tua kab mob (antibiotics) yuav laug txog li ntawm 25 feem pua rau tej neeg mob ntawm tej tsev kho mob noj yam tsis tsim nyog thiab.

Yog li ntawd tej kws kho mob thiaj nqua hu tej neeg sawv daws kom yog tsis tsim nyog noj tshuaj tua kab mob ces kom tsis txhob siv. Thiab hos tib los kub siab txog cov kev tu txhua yam kom huv si thiab pab kom yus lub cev muaj peev xwm tiv thaiv kab mob.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.