Australia cov Emergency Warnings thiab cov theem hav zoov kub hnyiab thiab yuav ua li cas

Australia yeej yog ib lub teb chaws uas muaj huab cua phem ua cuam tshuam txog kev phom sij, kuj tau tsim dua ib co qaum Australian Fire Danger Rating System tshiab coj los siv thoob teb chaws, thiab cov Australian Warning System coj los pab tej zejzog thiab tej neeg yuav tau xub tiv thaiv tej xwm txheej no kom nkag siab txog tej kev phom sij, kom paub npaj thiab kom paub daws ntau yam xwm txheej ti tes ti taw. Nod yog lub ntsiab lus ntawm cov theem ceeb toom txog hauv zoov kub hnyiab thias yuav muaj ceem npaum li cas thiab tsim nyog koj yuav tau ua dab tsi rau tej kev ceeb toom sib txawv.

Bushfires are a common occurrence in Australia, so knowing what to do could save your life. Source: AAP

Ntsiab lus tseem ceeb:

• Australia muaj cov Warning System thiab Fire Danger Rating System tshiab coj los siv lawm.
• Cov Fire Danger Rating System uas ua cov xim sib txawv thiab cov Warning System ces yeej muaj ntsis zoo siab xws.
• Yuav siv Australia cov Fire Danger Rating System coj los qhia tias seb hav zoov kub hnyiab ho yuav raug kev phom sij loj npaum li cas.
• Australia cov Warning System ces yuav siv coj los qhia tias ib co xwm txheej twg uas ta tom tshwm sim ntawd yuav muaj ceem npaum li cas.

Lub 12 hlis ntuj xyoo 2019 ces yeej muaj xov xwm thoob ntiaj teb cej luam txog Australia hav zoo kub hnyiab uas tsim kev puas tsuaj loj heev rau lub teb chaws no rau lub caij muaj kab hav zoov kub hnyiab 'Black Summer'.

Tom qab tau ntau lim tiam uas kob hav zoov kub hnyiab no dhau lawm ces yeej muaj tej chaw dav heev raug kub hnyiab, ua ke no los kuj muaj ib co zejzog uas raug kub hnyiab los kuj tseem raug dej nyab ntxiv thiab tom tau muaj nag xob nag cua thiab ntuj los nag hlob heev ces thiaj ua rau tej dej phwj los nyab.

Rob Webb uas yog tus coj lub koom haum National Council for Fire and Emergency Services ntawm Australia thiab New Zealand (AFAC) hais tias tau muaj tej koom haum tswj tej xwm txheej ti tes ti taw thiab pab cuam ntau tshaj 30 lub tau koom tes thiab npaj tswv yim tias seb yuav siv lub tswv yim twg thiaj muaj peev xwm sib txuas lus tau yooj yim tshaj plaws, yuav npaj li cas thiab yuav los daws tej xwm txheej ntuj tsim kev puas tsuaj uas muaj ntau zuj zus tuaj ntxiv thiab muaj ceem ntxiv no.

Nws hais tias “Lub caij uas peb tej huab cua tab tom pauv hloov no, thiaj ua rau peb pom tias muaj tej xwm txheej piam sij puas ntsoog phem zuj zus tuaj ntxiv lawm,”

Tab tom muaj tej xwm txheej puas tsuaj no sib txuas ua ntuv zus ntawm ib co rau ib co los yog tab tom muaj tej xwm txheej no rau tej chaw dav heev, ces thiaj ua raua peb yuav tau sib faib tej peev txheej thiab sib qhia tej xov xwm ntawm peb tej koom haum tswj tej xwm txheej ti tes ti taw no ntau tuaj ntxiv lawm.

Rob Webb, AFAC CEO

Source: AAP

Tsis ntev lo no ces Australia yeej tau kho dua nws cov Warning System thiab Fire Danger Rating System tshiab thiab kom siv tau yooj yim, ua tam sim no yeej siv zoo tib yam thooab teb chaws no lawm.

Kom tej koom haum tswj tej xwm txheej kub ntaiv thiab tej zej zog thiaj totaub txog cov theem ceeb toom tias yuav raug kev phom sij li cas thiab kom thiaj paub tias yuav ua li cas yog muaj tej xwm txheej ntuj tsim kev puas tsuaj tsis hais yuav nyob rau qhov chaw twg li.

Ces thiaj tau coj Australia cov Warning System tshiab coj los siv rau thaum lub 12 hlis ntuj xyoo 2020 thiab yeej tau coj los siv tswj ntau yam xwm txheej phom sij. Cov Fire Danger Ratings System uas raug txheeb dua tshiab los kuj raug coj los siv rau lub 9 hli ntuj xyoo 2022 lawm thiab.

Ces Australia cov Fire Danger Rating System thiab Warning System thiaj muaj ntsis zoo sib xws, tab sis yeej coj los siv rau cov theem ceeb toom uas tswj tej xwm txheej kub ntaiv sib txawv thiab cov kev phom sij sib txawv.

Australia cov kev ceeb toom txog theem phom sij ntawm hav zoov kub hnyiab (Australian Fire Danger Rating System) ces yog siv coj los qhia thiab ceeb toom rau tej zejzog tias kom pib npaj thaum twg yog muaj hav zoov kub hnyiab. Hos Australia cov Warning System ces yog siv coj los qhia txog cov theem tias yuav raug tau kev phom sij ntawm tej xwm txheej uas tau tab tom tshwm sim ntawd tias muaj ceem npaum li cas.

Cov theem ceeb toom txog kev phom sij ntawm hav zoov kub hnyiab yog dab tsi thiab muaj lub ntsiab lus txhais li cas?

Australia cov Fire Danger Rating System tshiab ces yeej siv coj los qhia txog tias ho yuav raug kev phom sij los ntawm ib kob hav zoov kub hnyiab li cas yog hais tias muaj kob hav zoov ntawd kub hnyiab tiag, thiab xam raws li tej huab cua thiab tej ib puag ncig uas cuam tshuam ntawd.

Fiona Dunstan uas yog tus National Community Engagement Manager ntawm lub koom haum kwv yees thiab ntsuam huab cua (Bureau of Meteorology - BOM) tshab txhais tias “Cov kev ceeb toom txog cov theem phom sij ntawm tej hav zoov kub hnyiab yog ib co uas siv tsi ntseeg coj los pab kom yus npaj txhij yog tias ho muaj hav zoov kub hnyiab tiag ... Uas yog ib cov kev qhia tias peb npaj kom txhij tias yuav tau ua dab tsi yog muaj hav zoov pib kub hnyiab.”

Thiaj muaj plaub (4) tso kob (xim) raug siv coj los ua cov kev ceeb toom txhob cov theem phom sij ntawm hav zoov kub hnyiab:

1. Hauj sim (yog kob ntsuab): Ces npaj tswv yim thiab npaj.
2. Siab (yog kob daj): Ces kom npaj tias seb yuav ua li cas.
3. Siab heev (yog kob txiv kab ntxwv): Ces yuav tau ua kiag ib yam dab tsi tam sim no coj los pov puag koj txoj sia thiab koj lub tsev.
4. Raug kev puas tsuaj loj kiag tam sid (yog kob liab): Ces yuav tsum tau tsiv tawm ntawm thaj hav zoov kub hnyiab uas yuav raug hav zoov kub hnyiab mas koj thiaj ciaj thiab dim.

Lub caij uas tseem muaj cov kev ceeb toom txog theem 'Hauj sim' thiab theem 'Siab', ces tsim nyog tej zejzog nrhiav xov xwm kom paub tias seb tej huab cua zoo li cas lawm thiab nrog xyuas kom sib cuag tau nrog lawv tej koom haum tswj tej xwm txheej kub ntaiv ntawm lawv tej zos kom thiaj paub txog tej xov xwm tshiab tias tej xwm txheej zoo li cas lawm.

Hos yog muaj cov kev ceeb toom txog theem ‘Siab heev (Extreme)’ lawm ces txhais tau tias yus yuav tsum tau ua raws li tej tswv yim npaj tseg kom yus dim ntawm tej xwm txheej hav zoov kub hnyiab. Hos yog poob rau cov kev ceeb toom theem 'Raug kev puas tsuaj loj kiag tam sid (Catastrophic)’ ces txhais tau tias ntshe tej zaum tej neeg tua hluav taws yuav tsis muaj peev xwm tswj tau kob hav zoov kub hnyiab ntawd lawm, yog li ces txoj xub kev nyab xeeb tshaj plaws ces yog yuav tau tsiv tawm mus rau lwm thaj chaw lawm xwb yog tias koj tseem nyob rau ntawm thaj chaw yuav raug kub hnyiab ntawd.

Australia cov kev ceeb toom txog cov theem phom sij ntawm tej hav zoov kuvb hnyiab.

Mr Webb tshab txhais tias “[Cov kev ceeb toom txog theem ‘Siab heev (Extreme) txhais tau tias] koj yuav tsum tau paub tias koj yuav tau ua dab tsi ... tsis hais seb puas yuav nyob ntawm thaj chaw yus tseem nyob ntawd, los seb yus puas yuav tau tsiv mus rau ib thawj chaw twg uas tau txais kev nyab xeeb dua.”

Nws kuj hais tias tsuas nyob rau ntawm ib co xwm txheej twg tsi ntsees ntawd seb yus ho yuav npaj yus cov bushfire survival plan thiab ho yuav ua li cas xwb. Txawm tias qee thaj chaw ntawm Australia uas muaj pej xeem nyob coob yog cov chaw uas pheej raug kub hnyiab dua rau lub caij ntau hli uas huab cua kub sov, los lwm ceeb tsam ntawm teb chaws no li sab qaum teb, los kuj raug kub hnyiab rau lub caij ntuj no thiab.

Cua hlob ua rau tej hav zoov kub hnyiab muaj ceem ntawm xeev Victoria. Source: AAP

“Yeej yuav muaj cov kev npaj tej tswv yim bushfire survival plan no sib txawv ntawm ib tug rau ib tug twg, tsuas nyob ntawm seb yus lub tsev nyob qhov twg, thiab yus ho tau npaj yus lub tsev zoo npaum li cas xwb, tab sis yog tias yus yeej hnov cov kev kwv yees huab cua lawm tias yuav muaj cib fim raug kev phom sij 'Siab heev (Extreme)' thiab yus ho nyob rau ntawm thaj chaw uas pheej raug kub hnyiab tas li thiab, ces tej no yog tej uas yus yuav tsum tau to taub tias yuav npaj tej tswv yim no li cas thiab yuav tau dab tsi.”

Elisabeth Goh yeej yog ib tug neeg ua hauj lwm yeem thaj (volunteer) ntev rau lub koom haum tua hluav taws NSW Rural Fire Service. Nws hais tias cov kev nkag siab txog cov theem phom sij ntawm tej hav zoov kub hnyiab no yog tej yam tseem ceeb heev, vim tej neeg pab cawm tej xwm txheej kub ntaiv no pheej yuav tau mus pab tej neeg uas tsis muaj peev xwm tsiv tawm raws lub caij tsim nyog tawm ntawd.

“Peb yeej ib txwm yuav tau pab tej neeg (uas tsis tsiv tawm) rau lub caij hav zoov kub muaj ceem heev ntawd .. Ces thiaj yuav tau siv tej peev txheej ntau yam uas siv coj mus tua hluav taws ntawd coj mus pab tu saib xyuas, thiab coj mus pab tej neeg ntawd kom tawm tau ntawm tej xwm txheej phom sij heev ntawd.”

Tej xwm txheej ntuj tsim kev puas tsuaj ntawm Australia. Source: AAP

Australia cov system ceeb toom (Warning System) thiab tsim nyog koj ua dab tsi

Australia cov Warning System yeej raug siv coj los qhia txog cov theem ntawm ib co xwm txheej kub ntaiv twg los yog ib co xwm txheej tseem tab tom tshwm sim ntawd tias muaj ceem npaum li cas. Thiab yeej siv cov system ceeb toom no rau ntau yam xwm txheej puas tsuaj uas ntuj tsim, tsis yog siv rau tej xwm txheej hav zoov kub hnyiab nkaus xwb.

Ms Dunstan hais ntxiv tias “[Cov kev ceeb toom no] yeej raug tsim coj los siv ceeb toom rau ntau yam xwm txheej phom sij li: dej nyab, hav zoov kub hnyiab, khaub zeeg cua, thiab huab cua kub sov, etc.,”

Thiab yuav siv [cov kev ceeb toom no] raws cov theem sib txawv tsuas nyob rau ntawm seb tej xwm txheej no ho yuav tsim kev phom sij li cas rau tej neeg txoj sia los yog lawv tej vaj tse los yog tej lagluam li cas xwb.

Fiona Dunstan, AFSM

Qauv piv txwv ntawm Australia peb theem kev ceeb toom.

Australia cov Warning System yeej raug muab faib ua peb yam xim sib txawv, thiab yeej muaj ntsis sib xws li Australia cov Fire Danger Rating System.

Yog thaum muaj hav zoov kub hnyiab los yog muaj tej xwm txheej phom sij tshwm sim, ces yuav pib siv cov kev ceeb toom muaj peb theem no. Ua yog:

1. Cov kev taw qhia (xim daj): Ces yog tau pib muaj ib cov xwm txheej dab tsi lawm. Tab sis kuj tseem tsis tau raug kev phom sij kiag tam sim ntawd. Thiaj xav kom kub siab soj qab taug tej xov xwm kom paub tias seb ho muaj tej xwm txheej pauv hloov li cas lawm.
2. Nrog xyuas thiab ua ib yam dab tsi (xim kab ntxwv): Yeej paub tias yuav raug kev phom sij. Tej xwm txheej los kuj tab tom pauv hloov lawm thiab yog li yus yuav tau pib ua ib yam dab tsi kiag tam sim no los pov puag yus thiab yus tsev neeg.
3. Cov kev ceeb toom txog xwm txheej ti tes ti taw (xim liab): Yuav muaj ib cov kev ceeb toom Emergency Warning thiab yog cov kev ceeb toom theem siab tshaj plaws. Thiab tej zaum koj yuav raug kev phom sij thiab koj yuav tsum tau ua ib yam dab tsi kiag tam sim ntawd. Yog tseem ncua tam sim no thiab ces yuav raug kev phom sij rau koj txoj sia.

Ms Dunstan hais tias tsuas nyob ntawm seb yog cov kev ceeb toom txog tej xwm txheej ti tes ti taw hom twg ces yuav tau ua raws cov kev ceeb toom ntawd.

Yog tias ho yog dej nyab los yog hav zoov kub hnyiab, ces yus yuav tau tsiv tawm ntawm thaj chaw ntawd. Tab sis yog ho muaj huab cua kub sov heev los yog los lawg ces xav kom nrhiav chaw nkaum.

Nws hais ntxiv tias cov kev paub tias yus yuav xub tau ua dab tsi li cas thaum ntxov yog tej yam tseem ceeb heev, thiab xav kom tej cuab yig sib tham thiab nug txog ntau yam lus nug ua ke kom thiaj paub npaj lawv tej emergency plan, yog tias nom tswv ho tau muaj ib co kev ceeb toom dab tsi lawm, piv txwv li:

• Peb yuav mus rau qhov twg?
• Peb yuav nqa dab tsi nrog peb mus?
• Peb yuav ua li cas rau peb tej me nyuam thiab peb tej tsiaj?

Mr Webb thiaj taw qhia kom ib tug twg nrog lawv cov chaw tswj tej xwm txheej kub ntaiv ntawm lawv tej zos tham thiab txheeb tej xov xwm txog ntau yam kev phom sij uas tej zaum yuav tshwm sim tau ntawm lawv thaj chaw ntawd seb yog dab tsi.

Seb puas yuav raug dej nyab? Puas yuav raug nag xob nag cua? Puas yuav muaj hav zoov kub hnyiab? Cov kev nkag siab txog tias yuav muaj tej xwm txheej phom sij dab tsi, thiab npaj kom paub tias yus muaj peev xwm ua tau dab tsi kom thiaj raug tej xwm txheej phom sij no tsawg yog tej yam tseem ceeb tshaj plaws.

Fiona Dunstan, National Community Engagement Manager, BOM

Ms Dunstan hais tias “Cov kev siv sij hawm me ntsis los txheeb kom yus totaub txog tej kev phom sij yuav muaj tau ntawm thaj chaw yus nyob yog tej yam uas yuav muaj peev xwm pab cawm tau yus tus kheej txoj sia thiab.”

Xov xwm ntxiv:

• Txheeb tau Australian Fire Danger Ratings System Fact Sheets ua 12 hom lus ntawm no.

Yog tias koj poob rau cov xwm txheej emergency, ces hu rau tus zauv xov tooj triple zero (000).

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.