ඔස්ට්‍රේලියානු පුරවැසිභාවය පිරිනැමීම සම්බන්ධව ක්‍රියාත්මක පරීක්ෂණ දැඩි කිරීමට ඔස්ට්‍රේලියානු මධ්‍යම රජය විසින් ඉදිරිපත් කළ සැලසුම අතහැර දැමෙනු ඇතැයි වාර්තා වේ.
SBS සිංහල සේවය සඳුදා, අඟහරුවාදා, බ්‍රහස්පතින්දා, සිකුරාදා පෙ.ව 11 සිට 12 දක්වා (ඕස්ට්‍රේලියානු වේලාවෙන්)
SBS Radio APP එකෙන් (Free download)
ඉංග්‍රීසි භාෂා පරීක්ෂණයක් ඇතුළු දැඩි කොන්දේසි කිහිපයක් සමග ඔස්ට්‍රේලියානු පුරවැසිභාවය පිරිනැමීම සම්බන්ධ නීති සංශෝධනය කිරීමට ඔස්ට්‍රේලියානු මධ්‍යම රජය පසුගිය වසර දෙක ඇතුළත උත්සාහ ගත්තේය.
Source: SBS
ඔස්ට්‍රේලියානු පුරවැසිභාවය පිරිනැමීම සම්බන්ධ නීති සංශෝධනය
ඔස්ට්‍රේලියානු පුරවැසිභාවය පිරිනැමීම සම්බන්ධ දැනට පවතින ක්‍රමවේදය සංශෝධනය කරමින් ඒ සඳහා වන කොන්දේසි සහ අවශ්‍යතා දැඩි කිරීමට 2017 වසරේදී ඔස්ට්‍රේලියානු මධ්‍යම රජය යෝජනා කළේය.
නමුත් එම යෝජිත වෙනස්කම් සෙනට් සභාවේදී කම්කරු පක්ෂය සහ ස්වාධීන සෙනට් සභිකයින් අතින් පරාජයට පත් විය.
රජය විසින් යෝජිත එම වෙනස්කම් ඉතා දැඩි බව ඔවුන් ප්‍රකාශ කර සිටියේය.
ඔස්ට්‍රේලියානු පුරවැසිභාවය පිරිනැමීම සම්බන්ධ ඔස්ට්‍රේලියානු මධ්‍යම රජය විසින් ඉදිරිපත් කළ සංශෝධන පහත පරිදි වේ.
- ඔස්ට්‍රේලියාවේ ස්ථිර පදිංචිය ලබා පුරවැසිභාවය සඳහා අයදුම් කිරීමට වසර 4 ක කාලයක් ඔස්ට්‍රේලියාවේ රැදී සිටීම.
- විශ්ව විද්‍යාල මට්ටමේ ඉංග්‍රීසි භාෂා ප්‍රවීනත්වය මැනීමේ පරීක්ෂණයකට මුහුණ දිය යුතු වීම.
- ඔස්ට්‍රේලියානු වටිනාකම් සහ සංස්කෘතිය පිළිබඳ පවත්වන සාමාන්‍ය දැනීම පරීක්ෂණය පුළුල් කිරීම.
එහිදී ඉංග්‍රීසි භාෂා ප්‍රවීනත්වය සඳහා මධ්‍යම රජය ඉදිරිපත් කළ යෝජනා යටතේ ඉංග්‍රීසි භාෂාව මැන බැලීම IELTS ලකුණු 6 මට්ටමේ තිබිය යුතු බවට වාර්තා විය.
නමුත් ඔස්ට්‍රේලියාවේ ස්වදේශ කටයුතු අමාත්‍යවරයා එම මට්ටම නැවත IELTS ලකුණු 5 මට්ටම දක්වා පසුව අඩු කිරීමට යෝජනා කළ බවද වාර්තා විය.
කෙසේවෙතත්, ඔස්ට්‍රේලියානු මධ්‍යම රජය විසින් මෙම සංශෝධන සිදු නොකරනු ඇතැයි වාර්තා වේ.
Source: AAP
සංක්‍රමණිකයින් පිළිබඳ මධ්‍යම රජයේ වැඩපිළිවෙල
ඔස්ට්‍රේලියාවේ ජනගහනය සම්බන්ධ අනාගත සැලැස්ම පිළිබඳ පසුගිය මාර්තු මාසයේදී ඔස්ට්‍රේලියානු මධ්‍යම රජය විසින් මූලික කරුණු ඉදිරිපත් කළ අතර එය සම්පූර්ණයෙන් ක්‍රියාත්මක කිරීමට ඉදිරියේදී අපේක්ෂා කරන බව ඔස්ට්‍රේලියානු මධ්‍යම රජයේ ආගමන කටයුතු පිළිබඳ අමාත්‍ය David Coleman, SBS පුවත් සේවයට පැවසීය.
මේ වන විට ඔස්ට්‍රේලියානු පුරවැසිභාවය පිරිනැමීමේ ක්‍රමවේදය පිළිබද මධ්‍යම රජය අධීක්ෂණය කරමින් සිටින බවත් පුරවැසිභාවය සඳහා ඇති ඉල්ලුම අනුව එය පුළුල් කිරීමට කටයුතු කරන බවත් අමාත්‍යවරයා පැවසීය.
මේ අතර ඔස්ට්‍රේලියානු පුරවැසිභාවය පිරිනැමීමේ නීති සංශෝධනය නොකිරීමට මධ්‍යම රජය තීරණය කිරීම පිළිබඳව Federation of Ethnic Communities’ Councils of Australia (FECCA) සංවිධානය ප්‍රසාදය පළ කර තිබේ.
ඉංග්‍රීසි භාෂාවේ වැදගත්කම සංක්‍රමණිකයින් හඳුනාගෙන ඇති අතර ඔවුන් බහුතරයක් ඉංග්‍රීසි භාෂාව ඉගෙනීමේ යෙදී ඇති බවත් FECCA සංවිධානයේ සභාපතිනී Mary Patetsos පැවසුවාය.
මේ අතර ඔස්ට්‍රේලියාවේ බහු සංස්කෘතික කණ්ඩායම් ඔස්ට්‍රේලියානු මධ්‍යම රජයේ මෙම යෝජනා වලට විරුද්ධව හඬක් නැගීම සම්බන්ධව ආගමන කටයුතු පිළිබඳ කම්කරු පක්ෂයේ ඡායා ඇමතිනී Kristina Keneally ද සිය ප්‍රශංසාව පළ කර තිබේ.
Source: SBS
ඔස්ට්‍රේලියානු පුරවැසිභාවය සඳහා ලැබෙන අයදුම්පත් සලකා බැලීම ආකාර්යක්ෂමයි
ඔස්ට්‍රේලියාවේ පුරවැසිභාවය ලබා ගැනීමට යොමු කළ අයදුම්පත් ඔස්ට්‍රේලියාවේ ස්වදේශ කටයුතු දෙපාර්තමේන්තුව විසින් නියමිත කාලයට සලකා නොබලන බව නවතම ජාතික විගණන වාර්තාව පසුගිය පෙබරවාරි මාසයේදී හෙළි කළේය.
ඒ හේතුවෙන් ඔස්ට්‍රේලියානු පුරවැසිභාවය සඳහා අයදුම් කළ අයදුම්කරුවන්ට තම අයදුම්පත් සලකා බැලීමේ වාරය පැමිණෙන තුරු බලා සිටීමේ කාලය තවත් දිගුවී ඇති බවද එම වාර්තාව පෙන්වා දෙයි.
නමුත් ඔස්ට්‍රේලියාවේ ජාතික විගණකාධිපති විසින් නිකුත් කළ එම වාර්තාව එල්ල කරන චෝදනා ඔස්ට්‍රේලියාවේ ස්වදේශ කටයුතු දෙපාර්තමේන්තුව විසින් ප්‍රතික්ෂේප කර තිබේ.
පසුගිය වසර තුන තුළ ඔස්ට්‍රේලියාවේ ජාතික ආරක්ෂාව සහ ප්‍රජා කණ්ඩායම් වල ආරක්ෂාව පිළිබඳ ඔස්ට්‍රේලියානු මධ්‍යම රජයට දැඩි ලෙස අවධානය යොමු කිරීමට සිදුවීම ඔවුන් මේ සඳහා නිදහසට කරුණු ලෙස දක්වා ඇත.
කෙසේවෙතත්, ඔස්ට්‍රේලියානු පුරවැසිභාව අයදුම්පතක් සලකා බැලීම සඳහා මේ වන විට මාස 19 ත් 22ත් අතර කාලයක් ගතවන බව ඔස්ට්‍රේලියාවේ ස්වදේශ කටයුතු දෙපාර්තමේන්තු වෙබ් අඩවිය වාර්තා කරයි.
Source : SBS සිංහල සේවය / SBS ප්‍රවෘති අංශය
Source: SBS Sinhala
