Kawm ntawv Hmoob

Cov chav kawm ntawv Hmoob ntawm Brisbane uas yuav pib qhia rau lub 4 hlis ntuj xyoo 2024 no mus.

School children raising arms in class Credit: Indeed/Getty Images/ABSODELS RF

Maiv Yaj hais tias 'peb lub koom haum Hmong Culture Brisbane Inc tseem tab tom npaj ib co chav kawm yuav qhia ntawv Hmoob rau me nyuam Hmoob lub 4 hlis ntuj (2024) no.' Thiab nws hais tias vim li cas thiaj xav qhia ntawv Hmoob rau Hmoob tej me nyuam.

Peb lub zeem muag (vision) uas tos peb yuav xav qhia ntawv Hmoob los vim peb cov me nyuam tam sim no tsis txawj hais lus Hmoob lawm, thiab lawv tsis totaub lus Hmoob lawm. Tej qho yooj yooj yim xwb los lawv twb hais tsis tau, lawv tsis totaub lawm ces yuav ua rau lawv hais lus tsis tau rau lawv niam lawv txiv, lawv pog lawv yawg rau lawv tej niam hlob txiv hlob, niam ntxawm txiv ntxawm los yog tej thaj kub thaj tim (tej cousins). Ces nyuaj nyuaj rau lawv. Ces peb thiaj xav tsim cov chav kawm no los qhia me nyuam Hmoob es kom lawv txawm tsis tau txawj sau thiab tsis tau txawj nyeem los kom lawv hais lus totaub.

Maiv Yaj, Hmong Culture Brisbane Inc.

Maiv Yaj hais tias 'peb tej niam txiv yuav tsum tau txhawb nqa kom peb tej me nyuam hais lus Hmoob kom ntau li ntau tau. Yus nyob hauv tsev los yuav tau hais lus Hmoob rau tej me nyuam. Tam sim no yeej muaj Hmoob tej YouTube videos ntau yam hais lus Hmoob, yog tias tej me nyuam nyiam saib cai tso rau lawv saib kom lawv ho paub qee lo lus Hmoob, yus ho nrog lawv hais lus Hmoob ntxiv thiab ces haj yam yuav ua rau lawv paub lus Hmoob ntxiv thiab.'

Kuv xav hais tias qhov hais lus thiab qhov nkag siab txog lus Hmoob yog qhov tseem ceeb ua ntej tshaj plaws ntawm peb cov me nyuam Hmoob. Yog tias lawv paub hais tau qee los lus tseem ceeb los yog paub hais lus me ntsis lawm ces peb yuav pib qhia lawv nyeem thiab yuav pib qhia lawv sau (ntawv Hmoob) ces kom lawv paub tag nrho tej ntawd.

Maiv Yaj, Hmong Culture Brisbane Inc.

Tsiaj ntawv Hmoob Credit: SBS Hmong

Nws hais tias 'peb cov curriculum qhia ces yuav qhia ntev txog 6 hli. Thiab yuav maj mam qhia ib qho zuj zus tuaj, li tej suab (tones), tej yub (vowels) tej phonics skills (cov kev tawm suab). Ces peb yuav pib qhia li no mus txog rau thaum uas lawv kawm tag ces lawv paub nyeem tau tej yooj yim los yog nyeem tau qhov nyuaj, thiab paub sau tau ntawv Hmoob.'

Ces lub koom haum Hmong Culture Brisbane Inc no thiaj yuav qhia cov chav kawm ntawv Hmoob no txhua txhua hnub zwj Hnub (Sunday) li 2 teev. Yog kuj yuav tsim ib pawg group chat thiab yuav kaw tej sob kawm tso rau hauv, kom yog leej twg kawm tsis cuag ncua los kom thiaj tau mus saib tej sob kawm uas lwm tus tub kawm tau kawm dhau los, ces yus mam li kawm yus los tau, los sis yog ho tsis totaub zoo ces mam li ho nug tej lees kais tshab txhais ntxiv.

Hmoob tej tub kawm uas tau kawm ntawv Hmoob dhau los ho xav li cas rau cov kev kawm ntawv Hmoob xwb?

'Cov lawv tau kawm dhau los mas lawv yeej hais tias yog tej yam nyuaj kawg thiab tiam si mas lawv kuj nyiam kawm heev thiab, vim yog tej yam tshiab rau lawv. Peb cov me nyuam Hmoob nyiam kawm ntawv Hmoob vim lawv paub tias yog lawv cov lus, ces lawv xav kawm heev ces lawv yeej hais tias nyuaj tiam sis mas lawv kuj yeej kawm tau thiab,' raws li Maiv Yaj hais.

Kuv xav tias yog ib qho zoo heev rau peb cov phaum neeg txuas ntxiv rau yav pem suab, kom peb Hmoob tej me nyuam khaws tau Hmoob tej lus cia kom tsis txhob ploj mus.

Maiv Yaj, Hmong Culture Brisbane Inc.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.