Cov ntsiab lus tseem ceeb:
- Qhov tseem ceeb ntawm cov tshiaj kav xyoo rau kev xaiv txij nkawm
- Tsiaj kav xyoo rau cov kev yug thiab tu tub ki.
Luna New Year xyoo 2022 no ces yog Tsov Dej xyoo thiab yeej muaj 12 tug tsiaj kav xyoo hloov ib tug kav ib lub xyoo. Yeej muaj ntau haiv neeg ntawm cov teb chaws Asia tsis hais East Asia, Southeast Asia los yog lwm cheeb tsam hauv ntiaj teb no nyias yeej muaj nyias cov kev ntseeg sib txawv rau tej tsiaj kav xyoo no thiab. Tab sis tej tsiaj kav xyoo no ho tseem ceeb li cas rau Hmoob tej kab lis kev cai?
Nchaiv Khwb Xyooj uas yog Hmoob ib tug laus neeg ntawm teb chaws Australia uas paub zoo txog Hmoob tej kev cai dab qhuas, tau piav txog tias - tej neeg yug rau cov tshiaj kav xyoo sib txawv ntawd sib haum los yog sib cov li cas rau lub caij xaiv txij nkawm.
Nws hais tias ''piv txwv li nyob rau cov tshiaj kav xyoo ntawd ces kev xaiv txij nkawm no ces tus yug nyuj xyoo yuav tsis tau tus yug tsov xyoo lawm, tus yug tsov xyoo ces yuav tsis tau tus yug nyuj xyoo. Yog nkawv sib yuav ces muaj muaj teeb meem, lub neej tsis tsheej cuab tsheej yig".
Raws li cov laus qhia peb uas peb tau saib los mus mas nws yeej tseem ceeb tiag tiag li. Yog li no mas tus yug nyuj xyoo mas nws yuav tsum mus yuav tus tsiaj txawv uas tsis txhob los dhos rau tus tsov ntawd, ces nws lub neej yeej txawv. Yog li ntawd ces ib tug tub yuav yuav nyab los lawv thiaj pheej nug hais tias - kuv tus tub xav mus yuav nyab es koj pab laij caij nyoog rau kuv es yuav kom me nyuam mus yuav nyab.
Txawm li cas los Hmoob tej kab lis kev cai no yeej ib txwm muaj txiv neej feem coob yog cov los kawm thiab siv tej txuj lov caij nyoog no ntau xwb yeej muaj tej poj niam los kawm tej txuj no tsawg tus xwb.
Nchaiv Khwb Xyooj hais tias - tsis hais tus tub tub ntxhais uas yuav mus yuav txij nkawm uas yug rau tus tshiaj kav xyoo dab tsi los xij, tab sis yog koj lov kiag cov caij nyoog tias lub hlis no, hnoob no yog tus tsiaj no kav lawm, ces koj lov kiag cov caij nyoog tej tsiaj kav ntawd es yog tias poob rau luav hnoob, poob los mus rau zaj hnoob, ces yog tub yuav nyab ces koj muab ob hnoob no rau lawv mus nrhiav yuav tub yuav nyab xwb ces los ua neej ces feem ntau yeej yog qhov zoo tshaj.
Nws hais ntxiv tias ''Hos yog txawv ob tug tsiaj no lawm ces yuav tsum tau xyuas cov caij nyoog no seb yog li cas tiag tiag ces thiaj li tsis muaj teeb meem rau khub niam txiv tub ntxhais ntawd no nas."
Yog li ntawd ne yog ib tug neeg twg yug rau ib tug tsiaj kav xyoo twg ne ho muaj lub ntsiab lus txhais tau li cas?
Nchaiv Khwb Xyooj hais tias - Raws li kuv tus laus no nco tau mas cov neeg yug rau zaj xyoo thiab yug rau luav xyoo mas, ob tug neeg no mas yog tseem yog yug rau luav xyoo tab sis hnoob yug ntawd los tseem yog luav hnub thiab no mas, tus neeg no ua neej nyob mas nws yeej tsis tshua txom nyem nawb tsis hais poj niam tsis hais txiv neej li, nws lub neej yeej txawv zog luag me ntsi yeej tsis tshua txom nyem li, luag tu tub kis los yeej hlob zoo, khwv nyiaj txiag los zoo li yeej nce tes dua, tus yug rau zaj xyoo thiab tus yug rau luav xyoo no mas feem ntau los ua neej yeej tsis tshua nyuaj siab pes tsawg no nad.
Hos yog ib tug neeg twg ho yug rau ib tug tsiaj kav lub xyoo ntawd thiab tseem ho poob rau tus tsiaj ntawd hnub los yog tus tsiaj ntawd sij hawm thiab ne ho txhais tau li cas?
Nchaiv Khwb Xyooj teb tias - Txawm tias tus neeg ntawd yug rau tus tshiaj kav lub xyoo ntawd, tab sis hnub ntawd yog tus tsiaj ntawd hnoob, lub sij hawm yug ntawd tseem yog tus tsiaj ntawd sij hawm thiab, ces tus neeg no yug los ua neeg yeej tsis tshua txom nyem pes tsawg. Raws li peb Hmoob mas tej laus yeej tsis tau qhia dab tsi rau yus txog tej tsiaj no, tab sis tuaj rau lub teb chaws vam meej no lawm ces cov me nyuam mam mus ua hauj lwm, ces mam mus nrog neeg Suav ua hauj lwm ua ke ces Suav mam tham hais tias - lawv neeg Suav mas tam sim no teb chaws vam meej no lawm mas, lawv yuav yug me nyuam mas lawv xaiv yug rau 'luav xyoo, zaj xyoo thiab npua xyoo' xwb.
"Txij li kuv tshwm sim los mus es kuv saib neeg yug raws li cov caij nyoog kuv li hais no mas, nws yeej tseem ceeb, ib yam li kuv ntsuas li kuv yug kev tsev me nyuam kiag, kuv yeej lov cov caij nyoog zoo zoo los mus, tsis hais tub tsis hais ntxhais li, yog tus twg mus rau lub caij nyoog li hais ntawd ces, koj nrhiav lub npe kom raws lub caij nyoog ntawd coj los hu rau, ces kuj hlob zoo kuj tsis muaj teeb meem."
Piv txwv li ''kuv yug kev tsev me nyuam no yog 12 tug, 6 tus tub 6 tus ntxhais, zoo nkaus kev tsev me nyuam tsis tshua muaj mob no ces yog kuv ntseeg ntawm 12 tug tsiaj kav xyoo no, ces zoo nkaus li kuv yug kuv cov me nyuam no ces, kuv lov cov caij nyoog no raws li cov laus qhia los mus tu cov me nyuam no ces zoo li tsis tshua muaj mob".
Neeg sab nrauv cov tu me nyuam es me nyuam muaj muaj teeb meem, me nyuam tsis tshua hlob ntawd lawv tuaj thov koj mus huas lawv cov me nyuam, ces koj lov cov caij nyoog tsuag tsuag, ces koj mus ces, koj cia li nqa hlua coj mus khi kiag, ces zoo nkaus li lawv tus me nyuam ntawd cia li hlob tsis muaj mob, cia li zoo, ces cia li hlob lawm. Ces tom qab lawv tu cov yau tuaj mus los cia li hlob zoo no mas, yog koj nrhiav lub caij nyoog koj saib lub caij nyoog lawv tuaj taij koj ntawd, ces koj lov kiag lub caij nyoog ntawd, ces koj mam li mus khi hlua rau lawv tus me nyuam ces cia li hlob zoo no ces yog koj saib ntawm 12 tug tsiaj no los mus xyuas caij nyoog ntawd los mus pab xwb, ces zoo nkaus li yus lub fwj chim cia li loj, neeg hais ib tug hais dhau rau ib tug, ces ib tug ntseeg dhau rau ib tug, ces muaj mob muaj teeb meem li cas los luag pheej lam hu tuaj rau koj, ces koj hais lus rau lawv los zoo nkaus li cia li zoo li koj cov lus koj hais ntawd tiag tiag thiab no ces, yog koj saib ntawm 12 tug tsiaj kav xyoo no los mus sab thiab xwb los yeej tau tib yam nkaus li thiab.
Nchaiv Khwb Xyooj kuj tau qhia tias ''peb Hmoob ces txij li tau ua tsov rog nrog Suav ces peb tsis muaj ntaub muaj ntawv lawm ces peb yeej txom nyem kawg nkaus. Peb ces qhov khaws tau ces tej laus pheej tseem muab 12 tug tsiaj no coj los ua caij nyoog rau peb khaws tseg, es yog tus nyiam khaws tus nyiam ceev ces khaws cov no cia ces siv ces tseem pheej siv tau raws li Hmoob teej Hmoob tug. Hmoob kab lis kev cai ces yog siv ntawm 12 tug tsiaj kav xyoo no los mus xyuas lawm xwb."
rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm ,, , thiab los yog download kom koj mloog tau SBS Hmong.
