Tshawb fawb txog Hmoob tej tshuaj rau qaib

Vim li cas thiaj tshawb fawb txog Hmoob tej tshuaj rau qaib?

Credit: Tshuaj rau qaib (SBS Hmong)

Zooxis Lis ces yog ib tug ntxhais Hmoob nyob ntawm xeev Minnesota thiab kuj yog ib tug uas tau kawm tshuaj ntsuab ntawm nws niam, thiab nws los kuj yog ib tug nurse ua hauj lwm los tau 10 dhau los thiab.

LISTEN TO

Tshawb fawb txog Hmoob tej tshuaj rau qaib

SBS Hmong

22/08/202418:27

Play

Nws qhia tias tom qab kawm tag ces ''kuv mam coj cov npe tshuaj no coj mus tshawb fawb kom peb paub meej tias lub npe Hmoob thiab npe Askiv yog li cas.''

Ces Zooxis Lis thiaj hais tias tam sim no ces tseem nyob rau lub caij ntu nruab nrab uas tseem tab tom ua cov kev tshawb fawb txog Hmoob cov tshuaj rau qaib no thiab cia siab tias yuav tiav rau xyoo tom ntej no. Vim rau qhov tseem yuav tau teeb txheeb txog ob peb tug tshuaj.

Ms Lis hais tias ''Yeej muaj ib tug neeg uas nws tau tshawb fawb txog Hmoob cov tshuaj ntsuab tab sis nws kuj tsis ua ntxaws npaum li peb cov kev teeb txheeb no vim nws tsuas tshawb fawb txog ib ob tug tshuaj xwb. Thiab nws los txheeb txog ib tug kab mob. Ces qhov no nyuam qhuav yog ib feem kaum ntawm tej peb tshawb fawb tam sim no uas txheeb txog tej tshuaj tshaj kaum tawm tus.''

Credit: Zooxis Lis/Zooxis Conservatory and Botanical Garden LLC

Zooxis Lis hais ntxiv tias ''tam sim no kuv tshawb fawb cov hom tshuaj ntsuab uas peb cov Hmoob niaj hnub siv ntag nawb, uas peb paub paub thiab niaj hnub siv ces yog cov tshuaj rau qaib. Tsis hais lub sij hawm li cas li tus laus tus hluas, poj niam txiv neej yeej siv tas li li od. Yog tias thaum twg muaj ib tug neeg yug me nyuam kiag tas nrho xwb ces peb yeej kom nyob nruab hlis es noj (tej tshuaj rau qaib) 30 hnub.''

Vim li cas thiaj tshawb fawb Hmoob tej tshuaj rau qaib.

Zooxis hais tias ''Peb cov hluas feem ntau mas ib qho uas txhawb nqa kuv tshaj plaws thiab ua rau kuv kub siab tshaj plaws mas yog peb cov hluas no tsis paub lub npe (tshuaj) lawm. Ces yug ib tug me nyuam tag tsis paub lawm ces pheej nug lo lus qub tas zog rau cov laus hais tias lub npe (tshuaj) hu li cas, siv ua dab tsi, zoo dab tsi, peb lo lus no mas yeej nug tas mus li 10 tus me nyuam los nug qhov qub, vim peb cov hluas tsis paub lawm nas. Ces thiaj tshawb fawb tej tshuaj peb niaj hnub siv ntag, kom peb nco qab ntsoov.''

Nws kuj qhia tias nws yeej muaj nws ib qho kev tshawb fawb PhD ntawm nws tus kheej tab sis tseem tsis tau tiav. Nws kuj tau tshwm nyiaj ntiag tug rau ib tug scientist los ua cov kev tshawb fawb no rau nws lub koom haum Zooxis Conservatory and Botanical Garden LLC.

Credit: Zooxis Lis/Zooxis Conservatory and Botanical Garden LLC

Zooxis kuj muab tus hmab ntsha liab (Red malabar spinach) los ua piv txwv tias yog ib tug uas muaj cov hlau (Iron) thaum coj los tshawb fawb lawm kom pab rau tej poj niam yug me nyuam tag es nchuav ntshav ntau ces pheej daj ntseg ces thiaj pheej noj tus tshuaj no xyaw tshuaj rau qaib pab kom lub cev rov qab tshiab tuaj thiab thiaj muaj zog.

Cov laus lawv tsis paub ntawv paub lus tab sis lawv yeej yog neeg muab tshuaj, lawv yeej txawm ntse tshaj peb cov me nyuam ob peb npaug lawm tab sis peb tsis kam ntseeg lawv, ces peb cov tshuaj no yeej yuav tuag noob ib hnub vim peb cov me nyuam tiam no hais tias - es zoo ua dab tsi mas tus niag nroj xwb na - tab sis yog peb ua zoo coj los tshawb fawb ces yeej yog ib qho muaj kuab yeej yog ib qho yuav los pab cawm peb txoj sia tab sis niam no peb tsis txawj los siv lawm xwb.

Zooxis Lis/Zooxis Conservatory and Botanical Garden LLC

'Thaum xub mas yog Kuv tus niam hluas Hmoov Paj Lis thiab kuv niam Maiv Yias yog ob tug qhiab Hmoob Paj Garden yog thawj tug Hmoob los qhib lub Hmoob organic garden hauv teb chaws Meskas. Thiab nkawv yog ob tug pib qhov research no thiab tshuas tshawb fawb tau lub npe Hmoob thiab npe Meskas ntawm 12 tug tshuaj ces nkawv kuj tau tso tseg kawm ces kuv thiaj los khaws ua txuas ntxiv ces thiaj los txog li no thiab,'' raws li Lis hais.

Credit: Zooxis Lis/Zooxis Conservatory and Botanical Garden LLC

Coj Hmoob tej tshuaj rau qaib mus noj tau ntawm tsev kho mob

Lis hais tias tam sim no ces muaj 3 lub tsev kho mob siv Hmoob cov tshuaj rau qaib noj uas nws hais tias hu ua 'Cultural diet' ces tsis Hmoob los tsav neeg twg xav siv los yeej yog ib co choice rau lawv xaiv.

Yeej yog ib qho peb noj tau - ua ntej ntuj tsim teb raug peb Hmoob yeej tau ua ntev ntev los lawm nas, ces peb noj los tsis ua cas tsis txhaum dab tsi tab sis tsis muaj leej twg tuaj noj ces peb kuj tsis qhia ntau tus tshuaj rau lawv thiab rau qhov tsis paub tias Meskas cov roj ntsha ho txawv li cas. Tab sis raws li peb tshawb fawb los mas peb yeej xaiv cov ib txwm siv kom tsis txhob txhaum yus lub cev coj los noj ces tam sim no lawv kuj siv thiab.

Zooxis Lis/Zooxis Conservatory and Botanical Garden LLC

Sob kawm qhia Hmoob tej tshuaj ntsuab

Zooxis Lis hais tias 'tam sim no kuv lub koom haum yeej qhia ib co sob kawm txog tshuaj ntsuab Hmoob ntawm library thiab tab sis tseem yog neeg Mekas mus kawm coob xwb, Kuv yeej xav txhawb nqa thiab xav kom tus Hmoob twg yog nyiam kawm los ho mus kawm vim tias tsis yog ua rau kuv xwb tab sis yeej ua rau tej me tub me nyuam thiab kuv xav ua rau haiv Hmoob tag nrho sawv daws kom paub meej meej hais tias tej tshuaj no yog Hmoob cov poj koob yawm koob yeej ib txwm siv es kom sawv daws ho paub tias yog dab tsi vim tias peb yog Hmoob.''

Lus ceeb toom:

Tej lus tawm tswv yim no tsuas yog tham qhia ua kev paub xwb. Yog koj xav siv tshuaj ntsuab ib yam twg ces yuav tsum tau sab laj thiab ntsib tej kws tshuaj ntsuab uas muaj ntau ntawv raug cai siv tau tej tshuaj no thiaj pab tau raws li qhov koj xav tau kev pab thiab thiaj tsis muaj teeb meem rau koj.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.