Yam ntxwv mob kab mob COVID uas mob ntev

Tej kws kho mob xav taw qhia rau zej tsoom sawv daws tias yog thaum koj kis tau kab mob COVID-19 thiab mob tau ntev txog li 2 hlis lawm tab sis pheej zoo tsis tu qab ces kom mus ntsib thiab sab laj nrog koj tej kws kho mob.

Ib tug poj niam tso dab ntub ntawm lub rooj zaum Source: Moment RF / Catherine McQueen/Getty Images

Puas yog tias koj muaj tej yam ntxwv mob COVID-19 uas pheej mob ntev tsis zoo tu qab li? Tej zaum tsis yog koj tib leeg xwb uas ntsib tej xwm txheej mob no. Vim yeej muaj tej neeg Australia tshaj 11 million tus kis tau tus kab mob COVID-19 ntawm Australia txij tau muaj tus mob no kis xyoo 2020 los.

Tej yam ntxwv mob long covid ces yog tej yam ntxwv mob COVID-19 uas pheej mob ntev tsis txawj zoo tu qab, thiab muaj cov yam ntxwv mob li pheej ua rau tus neeg mob ntawd nkees nkees, qaug lav, txog siav ua tsis tshua taus pa, ua rau ib ce tshee tshee, ua rau paj hlwb tsis kaj (cim xeeb tsis tshua zoo).

Raws li tau muaj ib co kev teeb txheeb tshiab ntawm tsev kawm qib siab RMIT University ntawm Melbourne qhia, ces Associate Professor Zhen Zheng ntawm RMIT uas paub zoo txog cov hauj lwm Health and Medical Sciences hais tias Australia tseem poob qab deb heev rau tej tswv yim los nrog xyuas tias yuav ua li cas rau tej xwm txheej mob no yog piv rau zej zog pej kum haiv. Nws thiaj 'xav kom yuav tau kub siab los qhia kom zej tsoom paub thiab nkag siab zoo txog tus yam ntxwv mob long covid no kom zoo tshaj qub ntxiv, vim tej zaum txhua 10 tus neeg mob twg yuav muaj ib tug muaj tej yam ntxwv mob no thiab.'

Associate Professor Zhang cov kev teeb txheeb kuj pom tias tej kws kho mob kiag los yeej tseem tsis tshua paub zoo txog tej yam ntxiv mob COVID-19 uas pheej mob ntev no thiab.

Nws thiaj taw qhia kom tej neeg yuav tau kub siab tu thiab saib xyuas yus tus kheej li ua exercise, xyuas kom tsis txhob nyuaj siab ntxhov plawv thiab noj tej zaub mov muaj txiaj ntsim pab rau yus lub cev.

Yog li Anne Wilson uas yog tus coj ntawm lub koom haum Emerge Australia thiaj meem txom heev tias uas li cas Australia tseem pob qab deb heev, thiab xav kom tsim kom tau ib cov tswv yim siv coj los tswj tus kab mob uas pheej tseem muaj tej yam ntxwv mob ntev no.

Ntxiv ntawd los kuj xav kom muaj tej xov xwm ua ntau yam lus rau Australia tej zejzog ntau yam tau siv.

Thiab xav kom tsoom fwv tshwm nyiaj coj los pab tej kws kho mob kom yog cov qhia tau tej yam ntxwv mob no tseeb rau tej neeg mob kom thiaj nrog ntsuam tau tej mob no.

Ua ke no los kuj tseem xav kom tej kws kho mob ib yam twg tsi ntsees (Allied Health services) los kawm kom paub thiab thiaj muaj peev xwm txheeb tau tej yam ntxwv mob no thaum ntxov, 'thiab xa tej neeg no mus siv cov long COVID specialist clinic', raws li Professor Zheng hais.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.