CBA khwv tau nyiaj tshaj AUD $9 billion

Australia lub txhab nyiaj loj tshaj plaws uas yog Commonwealth Bank of Australia (CBA) khwv tau nyiaj tshaj AUD $ 9 billion financial year dhau los..,

Xov xwm luv Credit: SBS/Max Banyat

Xov xwm luv tshaj tawm hnub zwj Feej (Wednesday news 14.08.2024):

Txhua txhua Australia ib tug tub kawm ntawm peb tug twg ntawm tag nrho 1.3 million tus ntawm tej teej kawm tshaj 9400 thoob teb chaws nyeem tsis tau ntawv meej thiab tsis paub zauv (Lej) zoo raws li tau muaj cov kev xeem National Assessment Program (NAPLAN test) rau tej tub kawm xyoo 3, 5,7 thiab 9.

Tau muaj tus kab mob Monkey pox teev tias yog ib tug kab mob yuav tsim tau teeb meem rau zej tsoom cov kev noj qab nyob zoo ntawm nrim av Africa tom qab tau muaj neeg kis tau coob heev. Tus kab mob no sib kis tau yooj yim heev yog nyob ze tus neeg kis tau tus mob no, thiab yuav ua rau muaj tej yam ntxwv mob li tau khaub thuas thiab pheej ua pob sawv paug.

Tej kws kho mob thoob teb chaws India tau mus tawm tsam ntawm lub nroog Kolkata tom qab tau muaj ib tug kws kho mob hnoob nyoog 31 xyoos raug deev thiab raug tua tuag hnub zwj Kuab (Friday) dhau los. Tub ceev xwm qhia tias tau muab ib tug tub ceev xwm yeem thaj txhom vim muaj feem nrog cov kev ua txhaum no.

Australia tus thawj pwm tsav Anthony Albanese tau mus tos Australia tej neeg sib tw Paris Olympic 2024 uas los rau ntawm Sydney Airport hnub no sawv ntxov thiab hais tias txhuas tus txawm ib txhia tsis yeej npib los yeej yog tej neeg ua rau Australia zoo siab heev thiab yog tej neeg tseem ceeb heev.

Peter Dutton uas yog tus coj ntawm lwm pab nom teb chaws hais tias kom tsis txhob pub tej neeg tsiv tsov rog ntawm Gaza tuaj rau Australia tom qab Mike Gurgess uas yog tus coj lub koom haum Australian Security Intelligence Organisation (ASIO) tau hais rau ob hnub so dhau los tias tsis txhob pub visa rau tej neeg pab Hamas. Tab sis Jason Clare uas yog Labor ib tug nom tseem ceeb hais tias yeej tseem siv tej cai tswj kev ruaj ntseg haiv li qub los txheeb tej neeg no thiab tsuas yog lawv tuaj pib neej tshiab vim lawv tsiv tsov rog.

Financial year 2022/2023 ces Australia lub txhab nyiaj loj tshaj plaws uas yog Commonwealth Bank of Australia (CBA) khwv tau nyiaj txog AUD $ 9.5 billion tom qab them se lawm.

Lub koom haum Australian Securities and Investments Commission (ASIC) tseem tab tom yuav coj Australia lub tuam txhab muag shares/stocks loj tshaj plaws uas yog Australian Securities Exchange Ltd (ASX) mus hais plaub vim tau liam tias nws tau dag ob co lus uas tau hloov cov computer system uas siv teev cov kev yuav shares thiab xa share.

Telstra thiab Optus tau qhia tias nkawv yuav ncua cov kev kaw cov 3G network txog tim 28 lub 10 hli ntuj 2024 no, tom qab tej zejzog tau tib tias tsam ua rau lawv tsis tau txais kev nyab xeeb vim tsis muaj peev xwm hu tau rau tus xov tooj triple zero (000).

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.