Tsis txhob txhawj tsam tsis tau qe txaus noj

Australia tus nom tswj dej num ua liaj ua teb ceeb toom tias kom neeg Australia tsis txhob txhawj tias tsam tsis tau qe qaib txaus noj ntawm teb chaws no...,

Xov xwm luv Credit: SBS/Max Banyat

Xov xwm luv tshaj tawm hnub zwj Quag (Tuesday news 11.06.2024):

Murray Watt uas yog Australia tus nom tswj dej num cog qoob loob hais tias tsis tsim nyog neeg Australia txhawj tias tsam tsis tau qe qaib txaus noj ntawm teb chaws no tom qab tau muaj ib cov chaw yug qaib ntawm xeev Victoria raug txheeb tau tias muaj qaib tuag aws thiab tau muaj tej qaib tshaj 500,000 tus tua. Ces thiaj ua rau lub tuam txhab supermarket Coles tau txwv tsuas pub ib tug twg yuav tau 2 teb qes thoob plaws rau nws tej khw ntawm teb chaws no tsuas tsis txwv ntawm Western Australia xwb. Txawm li cas los kuj muaj cov kev nqua hu kom neeg Australia tsis txhob ceeb thiab tsis txhob sib tw yuav nqe ntau ntau coj los npaj cia noj.

Tej neeg nyiam twv txiaj yuam pov yuav tsis muaj peev xwm siv tau lawv tej credit cards thaib tej digital currency mus siv twv txiaj yuam pov hauv online lawm, tab sis yeej tseem tso cai tej neeg siv tau credit card yuav lej (lotterries) hauv online. Yog lub tuam txhab twg tseem yuam cai ces yuav raug nplua tshaj $200,0000.

Tsoom fwv xeev Queensland (Qld) npaj yuav los pab nws tej pej xeem daws tej nuj nqes siv ua lub neej uas yuav ua rau nws tej nyiaj puag xyoo poob peev. Cameron Dick uas yog Qld tus nom tswj nyiaj txiaj qhia tias tsoom fwv yuav sau tej nqe ntau yam li qub uas ua rau nws yuav tsis tau nyiaj txog li $180 million rau financial year 2024/25. Thiab yuav ua rau nws tej nyiaj puag xyoo poob peev tshaj $8 billion. Txawm li cas los yeej tseem yuav tau nyiaj txog li $1,300 ntawm nom tswv xeev thiab tsoom fwv teb chaws los pab them nqe hluav taws xob thiab.

Lub koom haum Clean Energy Council xav kom pab nyiaj $6,500 rau tej cuab yig los yog tej tswv ntiav tsev uas nruab cov batteries yuav tsev coj los txhawb nqa kom tej neeg tig mus siv cov renewable energy ntau tuaj ntxiv tom qab CSIRO tau qhia tsis ntev los no tias renewable energy pheej yig dua cov kev siv nuclear energy.

NSW tus hau xeev Chris Minns qhia tias nws yuav siv nws cov nyiaj puag xyoo txog $15 million los pab rau tej tuam chav emergency department tej tsheb thauj neeg mob tam li yog ib cov kev pab nws tej public health system.

Lub rooj sab laj uas Switzerland uas tus tswv cuab tswj kom nrhiav kev thaj yeeb rau Ukraine tsis caw Russia mus koom tab sis Kremlin yeej tsis xav mus koom thiab vim nws hais tias tsuas ua raws li Ukraine tus president Zelenskyy lub tswv yim xwb.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.