Tsim tsab cai reproductive leave siv

Australia xav thov tsim tsab cai paid reproductive leave coj los siv kom lub caij tej poj niam coj khaub ncaws thiaj tau so 10 hnub los yog tej txiv neej thiaj tau thov mus txheeb cov prostate screenings...,

Xov xwm luv Credit: SBS/Max Banyat

Xov xwm luv tshaj tawm hnub zwj Feej (Wednesday news 31.07.2024):

Lub koom haum Transport Worker Union tau qhia tias Ernst & Yang uas yog pawg tswj tshiab uas los tswj lub tuam txhab dav hlau Rex Airlines tau qhia rau nws tias tej zaum yuav muaj neeg poob hauj lwm txog li ntawm 835 leeg tom qab tsis muaj peev xwm ua luam thiab tau ncua tsis ya tag nrho nws tej fij dav hlau. Tab sis lub tuam txhab no qhia tias yuav tsim cov fij dav hlau ya rau tej zos toj siab thiab tej nroog ntxiv. Ua ke no los Virgin Australia kuj hais tias nws yuav pub cov yuaj (ticket) dawb rau tej neeg uas tsis muaj peev xwm siv tau vim raug ncua thiab kom hu mus rau Virgin Australia Guest Contact Centre tus xov tooj 13 67 89 los los yog mus txheeb lub vas sab www.virginaustralia.com ua ntej hnub zwj Feej (Wednesday) tim 14 lub 8 hli ntuj xyoo 2024.

Tau muaj xov xwm qhia tias tau muaj neeg yam tsawg li ib tug tau tas sim neej thiab muaj ntau tus neeg raug mob rau lub caij Israel tau siv ib co drones tua 3 lub foob pob rau Lebanon lub tuam ceeb Beruit ua kev tawm tsam nrog Hezbollah tus coj raws li Lebanon lub koom haum National News Agency qhia.

Tau muaj ib txhia economists tau kwv yees tias ntshe Australia tej nyiaj tseem yuav poob nqe ntau ntxiv tuaj txog 1 feem pua ces yuav ua rau tus kab theem nyiaj poob nqe nyob rau ntawm 3.8 feem pua rau lub sij hawm 3 hlis dhau los no.

Cov kev sib tw Paris Olympics ces Kaylee McKeown kuj yeej npib koob rau cov kev sib tw ua luam dej ntxeev tiaj thiab sib tw tau zoo dua cov kev sib tw uas nws tau yeej npib kub ntawm Tokyo dhau los rau lub sij hawm 57.33 seconds. Australia pab txiv neej sib tw ua luam dej 200 metres free style final tau zum 4, Askiv tau zum npib kub, Meaks tau npib nyiaj. Australia pab txiv neej sib tw basketball kuj swb rau Canada 93-83, thiab Australia pab Kookaburras ces swb hockey gold medal nrog Belgium 6-2.

Xeev Victoria tej nom tswv tswj dej num noj qab haus huv tseem tsis tau paub tias yog qhov chaw twg tiag ntawm nroog Melbourne CBD uas ua rau muaj neeg mob tus kab mob Legionnaires uas tau ua rau 6 tus neeg raug kho ntawm chav ICU thiab tam sim no muaj 33 tug neeg tau tus mob no. Nom tswv kuj tau kwv yees ntxiv tias ntshe tseem yuav muaj neeg tau tus mob no ntau tuaj ntxiv thiab. Tsis tas li ntawd los ze ze rau qhov xeev Victoria yuav tsim tau ib tsab cai coj los tswj tej chaw hauv ib lub tsev twg kom tau cov air quality zoo ntawm Australia no thiab.

Chris Minns uas yog tus hau xeev NSW tau qhia tias yuav ua tib zoo xyuas kom xa tau ib co khoom tshiab muag kom tau nyiaj $50 billion los pab nws lub xeev kom thiaj tso tseg tau tsis siv tej chaw tsim hluav taws xob uas siv roj zeb ntsuam thiab tig mus siv cov renewable energy, vim Deloite tau kwv yees tias lub caij 10 xyoo no yog tsis ua dab tsi ces ntshe Australia yuav tsis tau nyiaj txog li $270 billions rau cov kev xa roj zeb ntsuam muag ntxiv lawm.

Tsev tsoom fwv kuj tau los txheeb tau tias cov kev pub tej neeg siv tau cov menopause leave los yog lwm cov leave tsis ua rau tej tswv lagluam tsis xav ntiav tej poj niam ua hauj lwm, tom qab lub 6 hli ntuj uas Senator Hollie ntawm pab nom Liberal tau hais tias yog tseem tsim tau tsab cai reproductive leave siv thiab ces ntshe tej tswv lagluam yuav tsis tshua xav ntiav tej poj niam ua hauj lwm.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.