ඔස්ට්‍රේලියාවේ වික්ටෝරියානු ප්‍රාන්තයේ සියලුම පාසල් එළඹෙන අඟහරුවාදා (24/03) සිට යළි දැනුම් දෙනතුරු වසා දැමීමට වික්ටෝරියානු ප්‍රාන්ත රජය තීරණය කර තිබේ.
කොරෝනා වයිරසය පැතිරීම වැළක්වීමේ අරමුණින් මෙම පියවර ගත් බව වික්ටෝරියානු ප්‍රාන්ත අගමැති Daniel Andrews පැවසුවේය.
පාස්කු පාසල් නිවාඩුව එළඹෙන මාර්තු 28 වනදායින් ආරම්භ වීමට නියමිතව තිබුණද පවතින හදිසි හා බරපතල තත්ත්වය මත එම නිවාඩුව දින 4කට පෙර ලබා දීමට ප්‍රාන්ත රජය අද (22/03) තීරණය කළේය.
පාසල් නැවත ආරම්භ කරන දිනය සෞඛ්‍ය බලධාරීන් සමග සාකච්ඡා කර තීරණය කරන බවද වික්ටෝරියානු ප්‍රාන්ත අගමැති Daniel Andrews පැවසුවේය.
මේ අතර නිව් සවුත් වේල්ස් ප්‍රාන්තයේද සියලුම පාසල් බොහෝ දුරට එළඹෙන අඟහරුවාදා (24/03) සිට යළි දැනුම් දෙනතුරු වසා දැමීමට පියවර ගනු ඇතැයි වාර්තා වේ.
ඒ පිළිබඳ අවසන් තීරණය අද (22/03) රාත්‍රියේ දැනුම් දෙන බව නිව් සවුත් වේල්ස් ප්‍රාන්ත අගමැතිනී Gladys Berejiklian පැවසුවාය.
