US President Joe Biden cu Democratic party chung buaibainak ruangah president thimnak in a chuak.
Biden nih cun January thla ah a term a dih tiang president rian ka ttuan lai, nain November thla thimnak belte ah cun ka zuam lai lo a ti. Cun, thimnak in ka chuah cu "ka party le ram caah a tha bikmi a si" tiah a chim.
Biden nih Kamala Harris, a vice-president cu party chung i thimnak ah a dirkamh. "ka saduhthah cu hi thimnak ah teinak hmuh hi a si" tiah a ti.
Aho nih dah Donald Trump a zuamcawh lai?
Democrats upa dang nih Harris cu party thimnak caah an zuamcawh lai le zuamcawh lai lo a fiang lo. Hruaitu thar thim thannak zong tuah khawh a si, nain a zuam cawhtu ding an um lo cun phun dang.
California Governor Gavin Newsom hi, Biden aiawhtu ah a cunglei lutlai nih an rak ruah cia mi a si nain, Newsom nih Harris cu a dirpi ve.
"Kan hmai lei ca humhimnak kong ruah ah siseh, kan ram democracy dirhmun zoh chih tikah, Kamala Harris hi kan ram muihnak ah a luhpi tu ding Donald Trump zuam cawhtu dingah a tlak. Amah nih kan ram America hi tha tein a hruai khawh lai, " tiah Newsom nih X ah a tial.
A dang zuamcawhtu a si khomi pahnih, Michigan Governor Gretchen Whitmer le Kentucky Governor Andy Beshear nih Biden thangthatnak cathanh an chuah nain vice president kong cu an chim lo.
Pennsylvania Governor Josh Shapiro le Transportation Secretary Pete Buttigieg nih Zarhpini ah Harris a dirkamhtu cathanh an chuah. An pahnih in Democrats leiin Vice President a cuh kho ding an si.
Democrats minthang dang — senator Elizabeth Warren le Kirsten Gillibrand telh in, cun congress palai Alexandria Ocasio-Cortez, Ilhan Omar le Adam Schiff — zong nih Biden a dinh hnu in Harris cu an dirpi ve.
Zei ruangah Joe Biden a lung a let?
Biden cu Zarhpi ni ah khan a lung aa let nak kong he pehtlai in mi pakhat nih Reuters news agency sinah a chim.
President nih zarhte zaan ah khan a rian tuan hawi kha thimnak ah ka zuam rih ko lai a ti hna nain, zarhpi ni zaanlei ah zuamnak in ka din lai a ti than hna.
"Nizan ah thawngthanhnak tuah a herhmi vialte tuah dih, rang taktak in hmai ah kan nor a hau," tiah mah kong a hngalmi pakhat nih Reuters sin ah a chim, min langhter duh loin a chim.
"Zarhpi ni zanlei 1.45pm hrawng ah: president nih senior team pakhat sinah a lung a thlennak kong theihternak a tuah."
