Ngunkhuai peknak kongah Labor nih phungthar a chuahpi mi cu Coalition lei nih an dirpi ve

Ngunkhuai pekning a then 3nak ah thlennak an tuahmi cu kamkhat lei ramkhel phu nih lungtlinpinak an langhter. Nain, Labor nih thimnak lioah biakamnak an rak tuah mi an tlinter lo mi cungah Coalition nih an soisel hna.

Opposition leader Peter Dutton (right) says the Coalition will support the stage three tax cut amendments. Source: AAP, SBS

Key Points

• The Coalition ramkhel phu nih Labor chuahpi mi ngunkuai tlawm deuh laknak kong cu biatak tein a dirpi.
• Kum khat ah $150,000 nak tlawm deuh a hmu mi Australia mipi pawl ngunkhuai tlawm deuh an pe cang lai.
• 1 July in thlennak an chuahpi mi phungthar cu a nung te lai.

Kamkhat lei ramkomh cozah ramkhel phu hruaitu Peter Dutton nih ngunkhuai kong thlennak Labor nih a chuahpi mi a dirpinak kong a chim.

Labor nih ngunkhuai peknak kongah thlennak a chuahpi mi cu Coalition nih a dirpi, asinain ramhruaitu Anthony Albenese bel cu biafak in an doh thiamthiam.

Ni hlawh niam a hmu mi le ni hlawh a laivuang a hmu mi nih ngunkhuai an pek mi tlawmter deuh a si lai tiin Labor nih phung thar an chuahpi. Amah belte, thimnak lioah Albanese nih mipi bia a kam mi a tuah lo caah Coalition lei nih an soisel, biafak in an ti.

"Harsatnak nih an nun a zelh cuahmah mi Australia mipi hna caah dawnkhantu ka si lai lo tiin Coalition cozah lutlai Peter Dutton nih a chim.

"Thlennak an chuahpi mi cu kan dirpi, kan cohlan ko nain ramhruaitu nih a chim mi lih belte cu kan cohlang kho lo."

Albanese nih ram mi hna ngunkhuai peknak he pehtlaiin phungthar ser dingin a rak kamh mi hna a tak in a tlinter lo ruangah Dutton nih lim chim pa tiah a auh.

Ngunkhuai peknak kongah thlennak an tuah ding mi cu 2024 chung a voikhatnak bik cozah riantuantu dihlak tonnak ah chuahpi le ceih a si te lai.

Ngunkhuai pekmi zorternak kongah na theih a herhmi a tanglei ah ka rak tial.

Albanese nih Australia mipi sinah ngunkhuai kongah biakamhmi

Australia ram mi chungin kum khat ah $150,000 nak tlawm deuh ahmu mi pawl cu ngunkhuai tlawm deuh an pe cang lai tiin Labor ramkhel phu nih Jan thla dongh lei ah thawng an thanh.

Khuasak tintuknak kongah lungreithei a thei mi Australia mipi caah thawngpang tha asi, atutan ah phungthar an sermi nih thathnemhnak tampi a ngeih hna lai tiin cozah lei nih an chim.

Amah belte, kum khat ah $150,000 nak tam deuh hmu mi caah cun thlennak an tuahmi cu that lei panh loin chiat lei tu a panh.

Kum khat ah $73,000 hrawng a hmu mi cu ngun khuai an pek hngak ding zat $1500 tluk a zor lai, nain kum khat $50,000 a hmu mi kha kum khat ah $929 tluk an mah nih an co khawh lai.

Hi thlennak an chuahpi mi hi Bawipa thawh hlan ah tlamtling tein ruahceih dih khawh si sehlaw, July 1 in cun nung kho cang seh ti Albanese nih a duh.

Source: SBS / Kenneth Macleod