Key Points
- Inn hlang dirhmun in khua a sa mi hna nih kum khat ah inn man $31,252 a buaktlak in an pek.
- Australia ram chung khuapi hna lakah inn hlan man a fah biknak cu Sydney a si, inn hlan man zarhkhat ah $745 an pek.
- Homelessness Australia nih Prime Minister Anthony Albanese sinah nawlnak an tuah.
Australia rampi huapin inn hlan man hi a tlangpi in zarhkhat ah $601 a phan. Cucaah, inn man peknak kongah lungrethei in a um mi le bawmhnak a kawl mi an karh taktak.
Naite ah CoreLogic nih hlathlainak an tuahmi a phichuak cu zapi nih hmu kho cio hna seh tiin an chuah. Hlathlainak an tuah mi chungah kan hmuh khawh mi cu kum khat ah a buaktlak in inn hlang nih inn man an pek mi hi $31,252 a si.
A luancia 2020 August thla ah khan zapi nih abuaktlak in inn man an pek mi hi zarhkhat ah $435 a rak si. Nain, 2023 December ah zapi nih inn man an pekmi hi zarhkhat ah $601 a phan, kum li chungah $164 a kai tinak a si. Australia ram chung inn hlan man kumkhat ah zatuak 8.3% a kai.
Australia ram chung inn hlan man zoh tikah, Sydney hi khuapi hna lakah inn hlan man a fah biknak hmun a si. Zarhkhat ah inn hlang nih inn man $745 an pek.
A changtu ah inn hlan man a fah biknak khuapi cu Canberra a si i, zarhkhat ah inn hlang nih inn man $651 an pek cun a pathumnak ah Perth khuapi a si. Inn hlang nih inn man $630 an pek.
A pali nak ah Brisbane khuapi a si. Inn hlang nih inn man zarhkhat ah $627 an pek cun a panga nak ah Darwin khuapi a si i zarhkhat ah inn hlang nih inn man $611 an pek.
Adelaide le Melbourne cu inn hlang nih inn man an pek mi a zat bak tei a si, zarhkhat ah tlangpi in $565 an pek.
Inn hlan man a den biknak cu Hobart khuapi a si, a tlangpi in inn man zarhkhat ah $535 an pe.
Zapi nihlawh silole kumkhat chung an tangka a lut mi chunginn inn man an pek mi zoh tikah a tam ngaingai. 2020 Marh thla lio le nikum September thla i zapi nihlawh chungin inn man pek mi zat zoh than tikah zatuak 26.7% bak a kai.
A luancia kum hra chungah inn le lo dirhmun zoh tikah zapi nih cawk khawh mi inn le lo hmuh a har ngaingai. Cu nih a chuahpi mi cu inn caw kho an tlawm, an mah khuasaknak lengin inn dang cawk chap kha a har chinchin tikah inn hlang dirhmun in khua a sa mi caah inn hlan ding tlawm. Inn hlan ding a tlawm caah inn hlan man a kai chinchin ve tiin CoreLogic’s report chungah kan hmuh khawh.
Inn hlan kongah a lungre a thei mi le harnak a tong mi hi an tam chin duahmah. Mi harsa hna bawmtu ding le dornak a pe tawn tu hna zong atu lio cu vansang in an um. Dornak a rak hal mi minung an karh tuk caah dornak a rak hal mi kip kha an bawm kho hna lo. Dornak ding caah bawmh a hal mi hi 57,519 hrawng an si nain dornak an tawlrel piak kho hna lo.
Australia ram hruaitu Anthony Albanese nih bawmhnak a rannak in a tawlrel nak lai Homelessnes Australia nih nawlnak an tuah. Labor nih khuasa tintuknak ah harsatnak a tongmi hna bawmhnak a tawlrel mi a um i umnak inn kongah lungre a thei mi kha I hmai thlak deuh dingin an aupi.
“Australia bantuk ram rum le ram tha ah hi bantuk harsatnak hi zapi nih kan ton awk a si lo” tiah a chim rel mi an rak um.
Inn le lo, khuasaknak kongah harnak kan ton mi hi kan tei khawhnak ding caah $450 million kan herh tiin Homelessness Australia nih a chim.
Ramkomh cozah nih inn le lo kongah harnak kan ton mi chungin chanchuahnak ding caah $10 billion a sengsen i inn man a ttum deuhnak ding caah le inn hlan man a ttum deuh nak ding caah santlai a si lai tiah zumh a si.
