A biapimi
- RBA nih tangka karh cu zatuak 4.35 ah an dirter.
- 2022 May thla thok in tangka karh voi 13 tiang an sanh hnu tangka karh dirter chung dingin hnatlaknak an ngei.
- Atutan hi tukum chungah a donghnak bik tonnak an ngeih a si lai. Cun, hmaikum cu tonnak tlawm deuh in ngeih an I tim.
Reserve Bank of Australia (RBA) i hruaitu upa pawl kum dongh hlan ah tonnak an ngei. Atutan tonnak an ngei cu 2023 chungah a donghnak bik tonnak an ngeih a si lai.
Kristmas zong kan hun neih ngai cang caah inn leiba a ngei mi hna zawn ruahnak he tangkarh cu zatuak 4.35 ah dirter rih dingin biakhiahnak an tuah.
Thiamsang hna nih an rak chim chung cia bang tangka karh cu pehzulh in dirter rih a si. Aruang cu September thla ah tanka man zatuak 5.6% tluk a tla mi kha October thla ah zatuak 4.9% ah a tum caah tangka karh an sanh ti lonak hi a si.
Australia ramchungah a ngan bikmi bank pali hna nih tangka karh an dirter rih lai an rak ti. An chim chung ning tein RBA lei nih biakhiahnak an tuah mi nihin ah thawng an thanh taktak.
Source: SBS
Tangka man hi zoh tikah a kai than ning a nuar ngaingai tiin hruaitu hna nih an chim.
“RBA nih thilman a thlenning he pehtlaiin tangka man an tahning an thlen. A luancia kum kan zoh si cun tangka man zatuak 5.3% tluk a tla. Caan tlawmpal a rauh hnu ah tangka man a van sang deuh than nain RBA nih tahfung an chiahmi a phan rih lo. Zatuak 2 in 3 kar tal cu phan kho she law ti an duh,” tiin cathanh an chuahmi ah hmuh khawh a si.
2022 May thla in tangka karh sanh hram thok, a tu lio tangka karh an cham mi kan rak zoh hna lai. Kum 30 chungah cham dingin an cawimi $500,000 leiba cu thlakhat ah an pek ding mi zat $1300 tluk a kai, Ting 10 leiba a ngei mi a si ahcun thla khat ah an pek ding zat $2603 tluk in a kai.
Hmaikum cu tonnak tlawm deuh kan ngei cang lai tiin RBA lei nih thawng an thanh.
2024 chungah an voikhatnak bik tonnak cu Feb 5 ah fehter a si, nihnih chung tonnak an ngei lai i a nihnihnak ni ah tangka karh he pehtlaiin biakhiahnak an tuahmi thawng an thanh te lai.
