Key Points
- Chungkhar tangka luhnak pakhat lawng a ngei mi hi inn hlan an I harh bik, cozah bawmhnak a dong mi silole pension bawmhnak a dong mi hi an har chinchin.
- Zapi caah inn hlan ding hmuh a har biknak hmun cu Queensland khuate lei a si, cu lioah Melbourne cu inn hlan ding hmuh a fawinak hmun ah a tel.
Atu lio cu Australia mipi caah inn hlan a har bik lio caan a si. Ramkulh le ramthen kip inn hlan man an kai dih. Khuachung zong inn hlan man a kai i, khuate lei zong cu thiamthiam.
Chawlehthalnak lei, inn man lei siseh rampi huap in hlathlainak a tuahtu nih an hmuh khawh mi cu Canberra le Hobart lawng hi a luancia thla 12 chungah inn man hawi tluk in a kai lonak hmun a si.
Queensland khuate lei hi inn man a kai taktak. Ramchung ah inn man a fah biknak hmun zong a si. Inn hlangtu nih inn man an pek mi hi an thla hlawh chungin zatuak 30% tluk a phan. An pekmi a tam kho taktak.
Pumpak le chungkhar dirhmun hoih in Australia ramchungah inn hlan khawh ning zong kan rak langhter lai.
Pumpak in cozah bawmhnak Jobseeker a dong mi cu an caah inn hlan ding hmuh a har ngaingai lai. Khuapi ah inn khan pakhat hlan an duh si cun an tangka hmuh mi chungin zatuak 75% tluk inn man ah a kal lai. Khuate lei ah an hlan si cun, zatuak 53% tluk an inn man ah a kal lai.
Cun, tangka luhnak dang a ngei lo mi pensen bawmhnak a dong mi zong an hmuh mi chungin zatuak 50% tluk cu inn man ah a kal lai.
Hlathlainak an tuahmi chungah an hmuh khawh mi cu hmunhma kip ah nuva tangka luhnak pahnih a ngei mi, fale he a um mi hi inn hlannak ah tangka tlawm bik a dih mi an si.
Khoika ramkulh dah inn hlan man a fah bik? Khoika sang le veng dah inn hlan man a fah bik, inn hlan ding kan kawl tikah kan hrial ding mi sang pawl zeidah an si?
Watch this image to see how housing affordability in your state capital compares to other major cities and the ACT. Source: SBS
New South Wales
Ramkulh chungah inn hlan man a fah biknak hmun hna cu Harbour city chung le khuapi chung sangveng hna an si. Inn an fak kho taktak, zapi caah hlan khawh ding inn an um lo ti tluk a si. Kum 2017 in khan inn hlan man biatak tein a rak kai.
Inn hlan man a fah biknak sang pawl hna cu Seaforth, Northbridge, Belrose. Frenchs forest, Warriewood le Avalon/Bilgola hna an si.
Zapi nih hlan khawh ding mi inn, inn hlan man a deng deuh mi pawl hna cu khuachung in km 15-20 tluk a hlatnak ah an um hna.
Chungkhar cozah bawmhnak Jobseeker a dong mi caah inn hlan ding hmuh a har lai.
Khuate lei hmun cheukhat zong inn man a rak kai ngaingai ve. Rili he a naihnak sang pawl chungin Bathurst, Maitland le Wagga Wagga hna ah zapi hlan khawh ding inn hmuh an har.
Victoria
Australia ram chungah a tulio cu Melbourne hi zapi zaran caah inn hlan ding hmuh a fawi. Ramkulh le hmun dang nakin inn man a deng. A luancia thla 12 chungah inn man zatuak 16% tluk a kai ko nain hmunhma dang nak cun a deng deuh rih.
Melbourne khua chungin km 15 tluk a hlannak hmun ah inn hlan ding man deng tein hmuh khawh an si. Amah belte, rili he a naihnak sang pawl Brighton, Hampton le Beaumaris hna cu inn hlan man an fak thiamthiam rih.
Khuate lei hmun cheukhat cu pulrai puanchuah hnu in inn man an kai. Torquay le Apollo Bay hi inn man a kai biknak hmun an si. Kerang, Nhil le Numurka hi inn hlan man a den biknak hmun an si.
Queensland
Brisbane chungah a um mi sang tam deuh cu inn hlan ding hmuh an har ngaingai cang.
Khuachung kiangkam deuh ah a um mi sang pawl Woodford, Rosewood, sandstone Point le Caboolture hna cu inn man zatuak 20% tluk an kai.
Queensland khuate lei hi ramkulh chungah inn hlan ding hmuh a har biknak hmun a si. inn hlan man hi cu ngai piin a fak lem lo nain pumpak le chungkhar tangka lutmi he cuai thlai tti tikah an tangka hmuh mi le inn man a thlau ngai. An nihlawh a tlawm ngaingai.
South Australia
Khuapi chung he a naihnak sang pawl cu inn hlan man an kai ngawt dih cang. Zapi nih hlan khawh ding inn an tlawm, a um ti lo khan a si.
Inn hlan man a tlawm mi, zapi caah hlan khawh ding inn cu khuapi in 30 km tluk a hlatnak hmun lawngah hmuh khawh an si cang.
A luancia thla 12 chungah inn hlan man 12.9% tluk a kai nain ram chungah inn hlan man tlawm tein hmuh ding a tam bik nak cu South Australia a si.
Western Australia
2020 kum lai in Perth khuachung inn man zatuak 52.4% tluk a kai. 2O16 hnu in khuachung inn man a fah bik caan a si. Khuapi chung hmun cheukhat cu inn man an deng ngai rih, khuapi in Marangaroo lei kam hrawng.
Khuate lei cu inn man cu tluk ngaiin a kai lo, zapi caah inn hlan khawh ding tampi an um rih.
Tasmania
2016 hnu in inn hlan man a tlangpi in zatuak 60% tluk a kai. Hobart inn hlan cu Melbourne inn hlan man he a tluk nawn a si. Chungkhar nih an hmuh mi tangka kan tuak a si ahcun zatuak 21% nak tlawm deuh an hmu.
Hobart khuachung le khuapi kiangkam hi inn man an deng ngaingai rih. Zapi caah inn hlan ding hmuh awk an um len rih. Australia ramchung ah inn hlan awk hmuh ding a tam biknak hmun pakhat ah a tel ve.
