* Ito ang unang kwento sa serye ng kwentong migrasyon namin.
Sa bawat kwentong migrasyon, may umaalis at may naiiwan. Sa bawat kwentong migrasyon, may mga damdaming nakakaramdam ng kawalan, ng pagmamahal, at ng pag-asa. Iba-iba ang ating mga kwento, ngunit pare-pareho ang ating mga pinagdadaanan. Ano ang kwento mo? #UsapTayo
Love at first sight ang naramdaman ni Jayvee ng makilala niya si Emma.
“Nung nakita kita alam ko na that you were the one,” sinabi niya kay Emma.
Sa kabilang banda, saad ni Emma, "[First impression ko sa'yo was] mukha kang mayabang...Naka-all orange ka pa."
Habang hindi mutual ang atraksyon sa umpisa, naging magkasintahan ang dalawa. Mahigit 17 na taon na silang magkasama.
Ngunit, noong ika-14 na taon ng dalawa, kinailangang umalis ni Jayvee patungong Australya para sa kinabukasan nila ni Emma. Ayon kay Emma, hindi siya umiyak nung umalis si Jayvee. Pinili niyang tatagan ang sarili niya para malagpasan niya ang mga hirap na pagdadaanan nila.
17 years and counting. Source: Emma Ocampo-Ramis
"Kung iiyak man ako, ayokong makita mo. Ayokong dumagdag sa bigat ng nararamdaman mo," aniya, "Two days before pa lang, iyak ka na ng iyak eh."
Patuloy na tumutulo ang luha ni Jayvee sa Melboure. Ayon sa kanya, nahirapan siyang wala si Emma sa piling niya.
"Two years pa tayo [bago] nagkita [ulit]. Sanay ako na lagi tayong nagkikita. Ang bigat. Yung part na yun ng buhay ko from positive [naging] negative," saad niya.
Sa huli, nag-asawa din ang dalawa, at nabigyan ng partner visa si Emma.
Ayon kay Jayvee, naging matagal ang masalimuot ang visa process; kaya ganun na lamang ang kasiyahan niya ng mabigyan na ng visa si Emma.
Ngunit ayon kay Emma, mahirap para sa kanya na malayo sa kanyang pamilya. Saad niya, nangungulila siya sa kanyang mga magulang, at ayaw niyang isipin na baka pagdating ng araw, uuwi na lamang siya dahil may kapamilya siyang nagkasakit o namatay.
Ganunpaman, masaya si Emma sa kanyang buhay ngayon kasama ni Jayvee sa Melbourne.
"Tandem tayo dito eh. Kung ano ang gusto mong marating, gusto ko ring marating," sabi niya kay Jayvee.
BASAHIN DIN
