Bislama Komuniti I pat long Pasifik Emerging Lida Summit

Long Novemba 24 – 1 Disemba 2023, 4 fala Bislama komuniti memba oli tekem pat long Pasifik Ostrelians emerging lidas summit we I tekem ples long Canberra (ACT), Ostrelia.

Bislama Komuniti memba long Pacific Australian Emerging Leaders Summit (PAELS) 2023 long Canberra, Australia

Summit ia hemi karem samples 36 delegates we oli kam long 14 Pasifik kantri evriwan, aot long namba ia, 12 long ol delegates ia oli kam aot long diaspora komuniti long Ostrelia, 9 fala long olgeta oli kamaot long Fes Nesen komuniti long Ostrelia, mo narafala 13 oli kamaot long ol narafala Ostrelian famili.

Program blong Summit ia I tekem ples long tufala ples long Ostrelia, hemia long Sydney mo Canberra. Long Sydney, ol participants oli lanem plante samthing long ol Fes Nesen Kaljarol tour mo tu oli harem Black Birding Histri we Sydney Kaonsela, Emelda Davis, we hemi seken jeneresen bon Ostrelian Saot Sea Aelanda. Samfala narafala samthing we oli tokbaot long summit ia hemi climate change, helt mo ol isiu we I stap afektem ol yut long region.

Sydney Kaonsela Emelda Davis mo Bislama Komuniti ladies

Mario Charles Liunamel hemi wan participant we I kam long Vanuatu olsem wan delegation memba blong Vanuatu Christian Counsel (VCC), mo hemi kivim smol tinktink blong hem abaotem summit ia.

Mifala kam wetem ol storian blong mifala mo sharem wetem ol narafala collegue participants we oli kam long ol nara Pasifika aelan kantri mo Ostrelia

Mario Charles Liunamel - Delegate blong Vanuatu

“Mifala kam wetem ol storian blong mifala mo sharem wetem ol narafala collegue participants we oli kam long Pasifika elan kantri mo Ostrelia. Ol storian, tinktink mo voes ia mifala I tekem I go antap long parliament mo mit wetem ol politicians mo sharem ol storian mo ol tinktink ia wetem olgeta, mi fortunate blong mit wetem tu memba blong parliament we tufala tugeta tufala woman lida, mo tufala kamaot long Ostrelian Labour Pati.”

Delegate Bianca Manning, wan yangfala lida blong Fes Nesen we I kamaot long Queensland, I talem se summit ia I provaetem wan janis blong ol indigenous Ostrelians blong oli save kam tugeta mo buildim ap wan patnasip wetem ol pasifik lida.

Yumi mas karem ol tinktink mo save we ol stret manples, ol pupu blong yumi long pasifik mo long Ostrelia oli gat blong mekem rod ia I kam mo klia

Bianca Manning - Fes Nesen Delegate blong Queensland

Source: SBS

“Naoia we yumi stap lukluk blong buildim wan strong, healthy mo prosperous Pasifik, yumi mas karem ol tinktink mo save we ol stret man-ples, ol pupu blong yumi long pasifik mo long Ostrelia oli gat blong mekem rod ia I kam mo klia.”

Micah Ostrelia nao hemi organisem summit ia mo karem tugeta ol yangfala Kristen lidas long Pasifik mo long Ostrelia. Nasonal Direkta blong Micah, Matt Darvas hemi talem se "wetem hae namba blong ol yangfala long region blong yumi, hemi impoten blong ol kantri olsem Ostrelia oli mas lisen mo wok wetem ol yangfala. Mifala bilif se ol stori, ol creativity mo patisipesen blong ol yangfala ia oli save kivhan blong bildim wan strong mo safe ples mo gudfala fiuja blong Pasifik famili.”

Summit ia I luk samfala lida blong Kavman tu we oli stap blong mitim ol participants, olsem Minista blong Intanasonal Divelopmen mo Pasifik, Hon. Pat Conroy, Shadow minista blong Intanasonal Divelopmen mo Pasifik, Michael McCormack mo Josh Wilson, memba blong Fremantle, mo tu Hae Komisina blong Aotearoa (NZ) Dame Annette King mo Hae Komisina blong Tonga Mr. Curtis Leonard Tu’ihalangingie.

Liunamel hemi kontiniu blong talem tu se hemi lanem plante samthing long wan wik even ia mo wan bigfala tinktink we hemi lanem nao hemi long saet blong empowerment blong ol Yut. Hemi se "hemi taem blong ol yangfala blong bildim ap capacity blong olgeta mo no tink nating long olgeta wan wan, beh blong wok mo akjivim wan samthing wetem ol save we oli gat."