Ostrelia mo Unaeted Stets tufala Apruvum Google Cable Deal

Google, bigfala Intanet Kampani long wol I talemaot se oli stap mekem redi samfala plan finis blong ranem ol intanet cable I go long eight pasifik aelan kantri, plan ia i kam anda long wan niufala deal we US mo Ostrelia tufala agri long hem.

U.S Presiden Joe Biden mo fes lady Jill Biden tufala i kivim welkam long Praem Minista blong Ostrelia, Anthony Albanese mo partna blong hem Jodie Haydon hemia long White House long Tuesde, namba 24 blong manis blong Oct, 2023 Source: AP / Manuel Balce Ceneta/AP/AAP Image

Anda long deal ia, bambae i luk oli inkrisim o mekem wan mo extensen long ol existing commercial cable projek we I stap finis long ol aelan kantri olsem Micronesia, Kiribati, Marshall Island, Papua New Guinea, Solomon Island, Timor Leste, Tuvalu mo Vanuatu.

Praem Minista Anthorny Albanese hemi talem se bae niufala google deal ia bambae I impruvum bigwan sekiuriti long region, mo hemi talem bigfala tankyu tu long U.S Presiden Joe Biden hemia taem hemi visitim White House long Washington, hemia long Wenesde namba 25 dei blong manis Oktoba, 2023.

Akrimen ia bambae I save mekem se Pis, Sekiuriti mo Sakses I stap long region

Praem Minista Anthorny Albanese

Ostrelian Praem Minista Anthony Albanese Source: Getty / Getty Images

“Mi talem bigfala tankyu long yu Mista Presiden, long gudfala wok we yu stap mekem blong mekem sua se ol stret loa mo oda blong wok I stap blong enkarejem yumi blong sharem ol tinktink mo save long saed blong defense teknoloji we bae hemi stap olsem bigfala pat blong akrimen we bae I save mekem se pis, sekiuriti mo sakses I stap long region”.

Ostrelia bambae hemi kivim samples $50 million I ko long projek ia mo bambae Unaeted Stets I kivim narafala $15 million.

Ostrelia I welkamem tu tinktink blong Unaeted Stet I sendem wan Coast guard ship I kam patrol long solwota blong Pasifik long eli nekis yia, 2024. Tinktink ia I blong helpem ol regional bodi long saed blong provaetem sapot blong daonem ol isiu blong maritime sekiuriti olsem ol illegal aktiviti long saed blong fishing we I kam antap bigwan long region.

Visit blong Praem Minista Anthorny Albanese ia hemi go blong strengthenem commitment blong Ostrelia mo Unaeted Stets blong mekem tufala kantri blong wok tugeta oltaem blong benefitim tufala mo Indo-Pasifik region.